Jak paviedamili ŭ kampanii, z 16 maja «BiełSieł» prypynić akazańnie pasłuh suviazi ŭ Homieli, Mahilovie, Viciebsku, Hrodnie, Marjinaj Horcy, Rečycy, Oršy, Žłobinie i Babrujsku «ŭ suviazi z madernizacyjaj sietki». Kampanija vykazvaje prabačeńni i płanuje paviedamić ab adnaŭleńni absłuhoŭvańnia dadatkova.
U kampanii taksama prainfarmavali ab źmienie kiraŭnika — vykanaŭcam abaviazkaŭ dyrektara TAA SP «BiełSieł» pryznačany Siarhiej Šynkaroŭ.
Raniej mabilny apieratar paviedamlaŭ ab płanach zapuścić u 2013 hodzie ŭ kamiercyjnuju ekspłuatacyju sietku novaha pakaleńnia LTE (4G).
TAA SP «BiełSieł» — pieršy sotavy apieratar Biełarusi, jaki atrymaŭ licenziju Ministerstva suviazi. SP było ŭtvorana ŭ studzieni 1992 hoda pradpryjemstvami suviazi Biełarusi i brytanskaj kampanijaj Cable & Wireless Plc. U žniŭni 2002 hoda ŭ licenziju byli ŭniesieny papraŭki, jakija pradastavili «BiełSieł» prava na stvareńnie sietki cdma2000. U červieni 2006 hoda apieratar uvioŭ u kamiercyjnuju ekspłuatacyju technałohiju pieradačy dadzienych 3G (treciaha pakaleńnia)
Ciapier udzielnikami kampanii źjaŭlajucca niderłandskaje pradpryjemstva CIB BV i biełaruskaje ZP «Džaraš» z kiprskim kapitałam.
Jak paviedamlaŭ BiełaPAN, u sakaviku 2012 hoda RUP «Biełtelekam», jakoje vałodała 50% sotavaha apieratara TAA SP «BiełSieł», vyjšła sa składu jaho zasnavalnikaŭ, tłumačačy taki krok adsutnaściu prapanoŭ pa raźvićci biźniesu.
«Usie my žyviem u XXI stahodździ — patrebny novyja technałohii, novyja padychody. Na žal, u kampanii, u jakoj my pracavali, nie było prapanoŭ pa dalejšym raźvićci biźniesu, jana technična spyniłasia ŭ svaim raźvićci. Siońnia patrebny technałohii ź vialikimi chutkaściami dostupu ŭ internet. Technałohii, jakija byli ŭ kampanii „BiełSieł“, nie dazvalali nam raźvivać biźnies», — patłumačyŭ žurnalistam u červieni minułaha hoda pazicyju «Biełtelekama» jaho hiendyrektar Siarhiej Papkoŭ.
