U Kitai šerah padziejaŭ nie dazvolena aśviatlać u srodkach masavaj infarmacyi. Žurnalisty, pravaabaroncy i apazycyjanery traplajuć u viaźnicu za krytyku ŭłady. I ŭsio heta — na tle nabližeńnia palityčnaha kanhresu kampartyi.
Prahlad navinaŭ časam moža ŭvieści ŭ depresiju — byvajuć dni, kali nehatyŭ ljecca z ekranu non‑stopam. Naprykład, pahladziš jakuju «Mižnarodnuju panaramu» pa ONT u niadzielu — i žyć nia chočacca, takija žudasnyja rečy adbyvajucca ŭ śviecie. Tamu kłapatlivy ŭrad Kitaju vyrašyŭ abaranić 1 300 000 svaich hramadzianaŭ — i zahadaŭ pieradavać tolki dobryja naviny.
Takim čynam, kantrol za medyjami staŭ bolš pilnym. A ŭsio tamu, što prezydent Chu Czińtao rychtujecca da 17‑ha partyjnaha kanhresu, dzie na čarhovaj pieratasoŭcy palitbiuro budzie pradstaŭlena novaja hieneracyja kitajskich palitykaŭ.
Zvyčajnaj praktykaj u Kitai stali aryšty internet‑žurnalistaŭ i karystalnikaŭ, jakija prytrymlivajucca apazycyjnych pohladaŭ. Sudy ŭ svaich rašeńniach aryjentujucca na zahady kamunistyčnaj partyi i vynosiać niepravamiernyja prysudy.
Mižnarodnaja arhanizacyja «Reparciory biaź miežaŭ» znoŭku i znoŭku nakiroŭvaje ŭradu Kitaju patrabavańnie vyzvalić ź viaźnicy bolš čym 50 asobaŭ.
Data praviadzieńnia 17‑ha partyjnaha kanhresu pakul trymajecca ŭ sakrecie, ale chutčej za ŭsio heta budzie kastryčnik. Z taje nahody miascovym ŚMI zabaroniena samastojna pravodzić acenku praduktaŭ charčavańnia i spažyvieckich tavaraŭ.
Naprykład, u Bejdžynie kiraŭnictva horadu vydała padrabiaznyja instrukcyi redaktaram pa aśviatleńni prahramy źmianšeńnia aŭtatrafiku. Kazać dazvolena tolki pra stanoŭčy ŭpłyŭ na ekalohiju. Nijakich interviju ź niezadavolenymi, nijakich fotazdymkaŭ zatoraŭ na darohach i pierapoŭnienych aŭtobusaŭ.
Bolšaści dziaržaŭnych ŚMI było taksama zabaroniena kazać pra krušeńnie mosta na poŭdni Kitaju, u vyniku čaho zahinuŭ 41 čałaviek.
I heta tolki niekatoryja prykłady z doŭhaha šerahu navinaŭ, pra jakija kitajcy tak i nie daviedajucca.