«Budźma!» prezientuje kancept «Kultura palapšaje žyćcio»

Hramadskaja kulturnickaja kampanija «Budźma biełarusami!» pradstaŭlaje šyrokaj hramadskaści novy kancept — «Kultura palapšaje žyćcio».

Hety łozunh užo dobra znajomy naviednikam rehijanalnych tok-šoŭ i kirmašoŭ prajektaŭ, jakija ładzić kampanija pa ŭsioj krainie. Za aficyjnym startam prajekta nas čakajuć novyja aktyŭnaści, jakija nie tolki prademanstrujuć, što mienavita kultura palapšaje žyćcio, ale i daduć kankretnyja prykłady taho, jak heta adbyvajecca.

Kaardynatar kampanii «Budźma biełarusami!» Alena Makoŭskaja tak kamientuje novy start: «Na našu dumku, hety słohan najbolš adpaviadaje tamu, čym zajmajecca kampanija. Jak viadoma, naša meta ŭ pahłybleńni nacyjanalnaj identyčnaści biełarusaŭ. U pačatku hoda my praviali sacyjałahičnaje apytańnie, pavodle jakoha bolš za 60% biełarusaŭ ličyć, što kultura palapšaje žyćcio, ale tracina ź ich nie moža adkazać, jak. A tyja, chto viedajuć, jak, u asnoŭnym usprymajuć kulturu jak kulturu stasunkaŭ (vietlivaść), kulturu pobytu (čystyja vulicy), ci mastackuju kulturu. My ž chočam danieści, što kultura — heta ŭsio, što składaje našaje žyćcio, i heta toje, jak my dumajem, na jakija kaštoŭnaści my abapirajemsia. Heta faktyčna sistema kaardynataŭ kožnaha čałavieka. Voś hetuju stvaralnuju funkcyju kultury my imkniemsia padkreślić u kožnym prajekcie, kožnym mierapryjemstvie».

Raskryćcio mesedžu kampanija raspačynaje sieryjaj admietnych videarolikaŭ, u jakich hieroi — paśpiachovyja, kožny ŭ svajoj śfiery, ludzi — raspaviadajuć pra toje, jakim čynam kultura źmianiła ich žyćcio i zrabiła ich realnymi trendseterami ŭ miedyjnym i hramadskim žyćci.

Nastupny krok — źniać stereatyp adnosna słova «kultura» i raskryć jaho maštabnaść, što najpierš miarkujecca zrabić praź vialikuju sieryju (40!) intervju z vybitnymi biełarusami.

Kaardynatar kampanii Nina Šydłoŭskaja: «Važna adznačyć, što fraza „Kultura palapšaje žyćcio“ ŭžo dobra znajomaja naviednikam rehijanalnych tok-šoŭ i „Kirmašoŭ prajektaŭ“, jakija ładzić kampanija pa ŭsioj Biełarusi z vosieni 2012 hoda. Pravioŭšy šerah mierapryjemstvaŭ u rehijonach, my pabačyli, što šmatlikija cikavyja idei i jość pa sutnaści adkazam na pytańnie: jakim čynam kultura moža palepšyć žyćcio ŭ kankretnym miescy, u kankretny čas. Kali ideja stanovicca realnym prajektam, tady da jaje dałučajucca inšyja ludzi, źjaŭlajucca adnadumcy, i heta prynosić vialikuju karyść i asobna ŭziatamu horadu, i kožnamu čałavieku, i ŭsioj krainie. Tamu hałoŭnaja meta novaj kamunikacyjnaj stratehii kampanii „Budźma biełarusami!“ — źmiena staŭleńnia da kultury jak da pasiŭnaha, dekaratyŭnaha elemientu, jaki nie zdolny ŭpłyvać na jakaść žyćcia štodnia i ŭ pierśpiektyvie».

Anłajn-prezientacyja novaha kanceptu pačynajecca čatyrma kreatyŭnymi videa-rolikami, jakija pa čarzie buduć pradstaŭlenyja šyrokamu hledaču.

Pieršym u pradstaŭleńni kanceptu «trymaje ŭdar» i vyvodzić ideju na šyrokija ekrany hieroj roliku numar adzin — viadomy biełaruski bajec Vital Hurkoŭ. Śledam za im u niečakanym rakursie na ekranach źjaviacca animatar Julija Rudzickaja i (u vyhladzie, pazbaŭlenym hiendarnych stereatypaŭ!) rekłamist Siarhiej Skarachod. Zakryje videa-sieryju čaćviorty rolik, u jakim nas čakaje sapraŭdnaje papury biełaruskich zorak, što padzielacca svaimi dosyć niečakanymi dumkami i padychodami adnosna biełaruskaj kultury i aktyŭnaj žyćciovaj pazicyi.

A štotydzień, kožnuju sieradu, pačynajučy z 22 traŭnia, na sajcie kampanii budzma.org buduć źjaŭlacca niečakanyja, admietnyja dumki znakavych ludziej z roznych śfieraŭ u admysłovym žurnalisckim prajekcie.

budzma.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH