Ministerstva zamiežnych spraŭ Biełarusi nie maje infarmacyi ab składzienych milicyjaj śpisach hramadzian, jakija naviedvajuć dypłamatyčnyja pradstaŭnictvy zamiežnych dziaržaŭ. Pra heta havorycca ŭ adkazie namieśnika ministra zamiežnych spraŭ Aleny Kupčynoj na zvarot pravaabaroncy Aleha Vołčaka.
Nahadajem, u kancy krasavika Vołčak nakiravaŭ u MZS list z prośbaj rastłumačyć, čamu supracoŭniki milicyi pierapisvajuć pašpartnyja źviestki naviedvalnikaŭ pasolstvaŭ ZŠA, Hiermanii, Vialikabrytanii.
U adkazie Kupčynoj adznačajecca: «U suviazi z tym, što supracoŭniki milicyi, jakija niasuć słužbu na pastach achovy, padparadkoŭvajucca ŭpraŭleńniu pa achovie dypłamatyčnych pradstaŭnictvaŭ i konsulskich ustanoŭ departamienta achovy Ministerstva ŭnutranych spraŭ Biełarusi, ich dziejnaść rehłamientujecca ŭnutranymi instrukcyjami adpaviednaha viedamstva».
Namieśnik ministra padkreśliła, što «ŭ adpaviednaści z art. 22 Vienskaj kanviencyi na dziaržavie znachodžańnia lažyć śpiecyjalny abaviazak prymać usie naležnyja miery dla abarony pamiaškańniaŭ pradstaŭnictva ad usialakaha ŭvarvańnia abo naniasieńnia ŭronu i dla praduchileńnia ŭsialakaha parušeńnia spakoju pradstaŭnictva abo źniavahi jaho hodnaści». «Pry hetym z kanviencyi dakładna vynikaje, što ŭ miežach realizacyi hetaha śpiecyjalnaha abaviazku dziaržava znachodžańnia samastojna vyznačaje miery, nieabchodnyja dla arhanizacyi biaśpieki kožnaha kankretnaha dyppradstaŭnictva, — adznačyła Kupčyna. — Vykarystańnie terminu „śpiecyjalny abaviazak“ praduhledžvaje, što miery, jakija prymaje dziaržava, mohuć i pavinny vychodzić za miežy mierapryjemstvaŭ pa ahulnaj achovie pravaparadku, što ažyćciaŭlajucca na pastajannaj asnovie na ŭsioj terytoryi dziaržavy».
