Fotafakt: U Dziaržynsku pabudavali pieršy ŭ Biełarusi «multykamfortny dom»

Pieršy ŭ Biełarusi «multykamfortny dom» pabudavany ŭ Dziaržynsku Minskaj vobłaści. Unikalnaść zbudavańnia ŭ tym, što, dziakujučy vykarystańniu inavacyjnych dla Biełarusi budaŭničych technałohij, enierhaspažyvańnie «multykamfortnaha doma» ŭ čatyry razy nižejšaje za ciapierašni standart, a kaeficyjent naturalnaj aśvietlenaści ŭ razy pieravyšaje narmatyŭny.

U domie prymieniena hibrydnaja sistema vientylacyi z rekupieracyjaj ciapła, dziakujučy čamu maksimalna źmianšajecca nahruzka na aciapleńnie. Haračaje vodazabieśpiačeńnie praduhledžana praz soniečnyja kalektary. Usie inžyniernyja sistemy abjadnany ŭ adzinuju aŭtamatyzavanuju sistemu kiravańnia domam, jakaja vymiaraje i kantraluje tempieraturu, aśvietlenaść, uzrovień CO2 i vilhotnaści.

«Enierhaefiektyŭnaść — heta tolki adzin z aśpiektaŭ kancepcyi našaha doma, — padkreśliŭ hienieralny dyrektar kampanii „Sien-Habien“ u krainach SND Hanzah de Pire. — Druhi składalnik — heta kamfort, uklučajučy akustyku, jakaść pavietra, kolkaść śviatła i ciapła ŭ pamiaškańni. Dom taksama pavinien być ekanamična dastupnym dla nasielnictva».

Prymianieńnie enierhaźbierahalnych technałohij pavialičvaje sabiekošt kvadratnaha mietra ŭ siarednim na 10–15%. Pavodle słoŭ dyrektara kampanii «Sien-Habien Budaŭničaja Pradukcyja Biełrus» Aleny Šyjonak, układańni akuplajucca za 6–7 hadoŭ. Raniej zajaŭleny košt kvadratnaha mietra ŭ «multykamfortnym domie» składaje 1.500 dołaraŭ, u toj čas jak u staličnych šmatpaviarchoŭkach siaredni košt varjirujecca ad 1.400 da 1.800 dołaraŭ za kvadratny mietr.

«Našaj metaj było pravieści ekśpierymient, prateściravać na efiektyŭnaść roznaje abstalavańnie, — skazaŭ architektar prajekta Alaksandr Kučaravy. — Paśla dvuchhadovaha manitorynhu my zmožam zrabić peŭnyja vysnovy i raspačać typavy prajekt „multykamfortnaha doma“. Dalej usio budzie zaležać ad popytu na rynku. Naša zadača — znajści bałans pamiž kamfortam i koštam takoha žylla».

Unutranyja azdablenčyjačnyja raboty ŭ novabudoŭli jašče nie zavieršany. Finalnym štrychom pavinna stać vietraŭstanoŭka, dziakujučy jakoj dom nie tolki zabiaśpiečyć siabie enierhijaj, ale i zmoža «zarablać» 500 dołaraŭ u hod.

Va ŭračystaj cyrymonii adkryćcia «multykamfortnaha doma» ŭziali ŭdzieł pasoł Francyi ŭ Biełarusi Mišel Reniery i namieśnik ministra architektury i budaŭnictva Dźmitryj Siemiankievič.

• 0
• 0
• 0
• 0
• 0
• 0
• 0
• 0