Ułady paabiacali Duni Mijatavič, što pierastanuć zatrymlivać žurnalistaŭ

Pradstaŭnica ABSIE ŭpeŭnienaja: pieradumovami lubych stanoŭčych źmien źjaŭlajucca spynieńnie pieraśledu i zatrymańnia žurnalistaŭ. Paśla «vielmi kanstruktyŭnych dyskusij, jakija adbylisia 4 červienia», jana spadziajecca, što padobnaja praktyka spynicca nazaŭsiody. Užo ciapier «nazirajucca peŭnyja pazityŭnyja źmieny adnosna spravaŭ Andreja Pačobuta i Antona Surapina, i treba dumać, prablemy ŭsich astatnich abvinavačvańniaŭ taksama buduć chutka vyrašanyja», — spadziajecca jana.

«Ja suprać manipulavańnia navinami, — kaža Mijatovič, — i tamu ja ščyra kažu, što atrymała siońnia pramyja znaki taho, što ŭłady hatovyja na heta pajści. I ja pavinna być aptymistyčnaj, bo kali b ja nie była aptymistyčnaj, ja b tut nie siadzieła. Ale ja taksama i realistka, ja viedaju, što vialikija źmieny nie mohuć zdarycca za adnu noč».

Taksama pradstaŭnica ABSIE spadziajecca, što Ministerstva infarmacyi pierastanie razdavać papiaredžańni niedziaržaŭnym ŚMI.

Mijatavič taksama zaklikała ŭsich žurnalistaŭ abjadnoŭvacca i pracavać z uładami, turbavać ich, kab jany viedali, jak važna raspracoŭvać zakony, jakija buduć padtrymlivać, a nie pieraškadžać raźvivacca ŚMI ŭ krainie.

«Zaraz Biełarusi patrebnyja libiralizacyja i źmiena zakanadaŭstva, jakoje tyčycca ŚMI, — kaža pasłanka ABSIE. — Heta naša karotkaterminovaja meta, na jakoj ja źbirajusia zasiarodzić uvahu ŭ supracoŭnictvie z uładami krainy i žurnalistami. U pryvatnaści, treba refarmavać zakony ab ŚMI i internecie. Ja taksama chaču bačyć stvareńnie hramadskaha radyjo i telebačańnia, bo Biełaruś — adzinaja ź niešmatlikich krain, dzie takoha niama».

Padčas vizitu Duńja Mijatovič zaŭvažyła taksama niekalki pazityŭnych źmienaŭ u biełaruskaj miedyjaśfiery. Pa-pieršaje, usio bolš ludziej majuć dostup da internetu, i hetaja praktyka pavinna praciahvacca, kab spryjać raźvićciu pluralizmu ŭ ŚMI. Pa-druhoje, Mijatavič paradavałasia infarmacyi, što «niekatoryja vydańni pierarehistravali, u tym liku «Našu Nivu», «Narodnuju volu» i niekalkich druhich haziet, bo mienavita hetaha ABSIE patrabavała ŭ svajoj pierapiscy ź biełaruskimi ŭładami». Tut Mijatavič, imavierna, pamyliłasia, bo i «Naša Niva», i «Narodnaja vola» apošni raz prachodzili pierarehistracyju ŭ 2009 hodzie. Mahčyma, Mijatavič pabłytała z časopisam «Arche», jaki sapraŭdy pierarehistravali ŭ mai, z 4-j sproby.

«Žurnalisty mohuć raźličvać na mianie, ja budu ich hołasam, — padsumoŭvaje Mijatovič. — I biełaruskija ŭłady mohuć raźličvać na toje, što ja budu dapamahać im, ale ja spadziajusia ŭbačyć vyraznyja sihnały i vyniki vielmi chutka. Kali ja ich nie ŭbaču, ja nie budu saromiecca i znoŭ pačnu krytykavać. My pavinny dazvalać krytyku niezaležna ad taho, nakolki jana moža być balučaj. Žurnalisty nie pavinny za heta traplać u turmu ci padviarhacca pieraśledu. Heta cana, jakuju my płacim za demakratyju».

Pradstaŭnica ABSIE padčas vizitu sustrełasia z namieśnikam kiraŭnika Administracyi prezidenta Alaksandram Radźkovym, pamočnikam prezidenta Valeryjam Brylovym, ministram infarmacyi Aleham Pralaskoŭskim, staršynioj Viarchoŭnaha suda Valancinam Sukałam, hałoŭnym redaktaram haziety «SB. Biełaruś siehodnia» Paŭłam Jakubovičam, kiraŭnikami kamisij pałaty pradstaŭnikoŭ, kiraŭnictvam i členami Biełaruskaj asacyjacyi žurnalistaŭ i Biełaruskaha sajuza žurnalistaŭ.

Siońnia adbuducca sustrečy ź ministram zamiežnych spraŭ Uładzimiram Makiejem i staršynioj Biełteleradyjokampanii Hienadziem Davydźkam.

• 0
• 0
• 0
• 0
• 0
• 0
• 0
• 0