«Nie vieru, što heta piša jana». Taćciana Martynava śćviardžaje, što Karpušonak taksama źnikła
Delehatka Kaardynacyjnaj rady Volha Karpušonak, jakaja ŭ sacsietkach abvinavaciła kiraŭnika Narodnaha antykryzisnaha ŭpraŭleńnia Paŭła Łatušku ŭ charasmiencie, zrabiła hetuju zajavu nie sama, miarkuje kiraŭnica frakcyi KR «Chopić bajacca» Taćciana Martynava. Pra heta jana raskazała «Biełsatu».
Volha Karpušonak uvachodzić u frakcyju Taćciany Martynavaj, adnak surazmoŭca pryznajecca, što nie razumieje, što adbyvajecca — Volha nie vychodzić na suviaź. Martynava adznačaje, što apošni raz bačyłasia z Volhaj na kanfierencyi «Novaja Biełaruś» u Varšavie 9—10 žniŭnia. Abmiarkoŭvali jany tady pracoŭnyja pytańni.
«Ja pieražyvaju za Volu, tamu što vielmi dobra da jaje staŭlusia. Ja nie vieru, što heta piša jana. Kali b u jaje byli niejkija surjoznyja prablemy z Łatuškam, jana b bajałasia, jana b mnie skazała. Va ŭsio, što jana raskazała pra Pał Pałyča, nie varta ŭ heta vieryć zdarovym rozumam. Heta padobna na niejkuju prapahandysckuju historyju, ale mnie ciažka pavieryć, što jana pieršapačatkova była zavierbavanaja», — kaža Taćciana Martynava.
Pavodle jaje infarmacyi, toje, što zajaviła Karpušonak pra ździeki ź jaje SBU, pakul jana žyła va Ukrainie, taksama nie adpaviadaje rečaisnaści. Volha bolš nie bačyła pierśpiektyŭ znachodžańnia va Ukrainie, vierahodna, tamu, što rasstałasia z chłopcam-ukraincam, kaža Martynava.
«Z nahody SBU. Ja kažu nie tamu, što ja va Ukrainie. My ŭsie, publičnyja asoby, tak ci inakš sutykalisia z supracoŭnikami SBU. Heta nie supracoŭniki FSB ci KDB. Heta vychavanyja ludzi. Kali ty nie chočaš ź imi havaryć, jany sychodziać», — praciahvaje jana.
Surazmoŭca padazraje, što z Karpušonak zdaryłasia niešta drennaje.
«U hetaj historyi ja nie mahu pavieryć, što jana achviara. Kali b Pał Pałyč tolki padumaŭ, Vola b užo adviesiła takoha, jak jana ŭmieje. Ja dvojčy pierahledzieła jaje videa. U mianie adčuvańnie, što heta čytka z suflora, tamu što Vola tak u zvyčajnym žyćci nie razmaŭlała. Jana niejkaja apuchłaja, vielmi drenna vyhladaje, choć naohuł jana vielmi pryhožaja dziaŭčyna. Dalej kałona, jakaja na zadnim płanie — heta nie Polšča», — kaža Martynava.
U jaje jość viersija, što Volha ŭžo nie ŭ Jeŭrasajuzie.
«Dzie — nie viedaju. Jak my nie viedajem, dzie Kotaŭ i Mielnikava. Ja baču začystku. Da kaho mohuć, da taho dabirajucca [biełaruskija śpiecsłužby. — Red.]», — praciahvaje Martynava.
Volha Karpušonak paviedamiła ŭ sacsietkach ranicaj 30 žniŭnia, što da jaje damahaŭsia Pavieł Łatuška i pahražaŭ stvaryć prablemy ŭ Polščy, a taksama, što była vymušanaja zjechać z Ukrainy praz ckavańnie z boku SBU.
Pavieł Łatuška ŭ svaim kamientary nazvaŭ heta paklopam i nie vyklučyŭ, što budzie sudzicca.
Paźniej na staroncy Volhi ŭ Facebook zjaviłasia nastupnaje paviedamleńnie:
«Dziakuj za padtrymku, buduć padrabiaznaści i dokazy, vočnyja staŭki i palihrafy. U ciapierašni čas usie maje sacsietki padviarhajucca ŭzłomu».
Pry hetym jana nie vychodzić na suviaź z kalehami i žurnalistami.
Łatuška abviarhaje abvinavačańni ŭ charasmencie ad delehatki KR Karpušonak
Pry Łatušku kruhłasutačna znachodzicca pryłada, jakaja moža vyličyć jaho miescaznachodžańnie z dakładnaściu da mietra
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia
Ciapier čytajuć
Aleksijevič: Adno z samych mocnych uražańniaŭ u žyćci — kali ja apynułasia ŭ natoŭpie ŭ 2020 hodzie5
Kamientary