Małady čałaviek čakaje, pakul źniknuć pakupniki. Skrynšot ź videazapisu kamiery nazirańnia apteki.
Dramatyčny momant: 70-hadovaja žančyna sprabuje dahnać rabaŭnika. Skrynšot ź videazapisu kamiery nazirańnia apteki.
U paniadziełak kala 19-j hadziny kala apteki pa vulicy Žynoviča, 11 (Frunzienski rajon), prahulvaŭsia małady čałaviek. Niahledziačy na ciopłaje nadvorje jon staranna chavaŭ nižniuju častku tvaru šalikam, paviedamlaje sajt HUUS Minharvykankama.
Dačakaŭšysia, kali ŭ aptecy nie było pakupnikoŭ, a farmaceŭt vyjšła z-za pryłaŭka da vitryny, małady čałaviek naciahnuŭ palčatki i chutka ŭvajšoŭ u dźviery.
Paprasiŭ špryc, a kali žančyna nakiravałasia za patrebnym tavaram, małady čałaviek kinuŭsia da kasy i vychapiŭ hrošy. 70-hadovaja farmaceŭt pasprabavała adabrać z ruk rabaŭnika hrošy, jana i rabaŭnik pavalilisia na padłohu. Złamyśnik padabraŭ 1,6 młn rubloŭ i kinuŭsia da dźviarej. Pažyłaja žančyna biespaśpiachova sprabavała dahnać jaho. Paśla hetaha nacisnuła tryvožnuju knopku. Bližejšy narad prybyŭ apieratyŭna, byŭ arhanizavany pošuk napadnika ŭ bližejšych kvartałach, adnak zatrymać rabaŭnika pa haračych śladach nie ŭdałosia.
Kamiera nazirańnia zapisała napadnika. Pa zapisie vidać, što jon zakryvaje tvar. Tym nie mienš, chłopca možna apaznać.
Supracoŭniki milicyi źviartajucca da tych, chto moža dapamahčy va ŭstanaŭleńni asoby złamyśnika, paviedamić ab hetym u dziažurnuju čaść Frunzienskaha RUUS Minska.
Kantaktnyja telefony: (044) 795-93-37, (017) 213-04-76, (017) 252-02-02. Kanfidencyjalnaść harantavanaja.
