Baraćba z kiberšpijanažam apynułasia i ŭ centry abmierkavańnia ŭ kiroŭnych kołach NATO, piša žurnalistka ŭkrainskaj słužby Radyjo Svaboda Alena Remoŭskaja.
Biełaruś trapiła ŭ śpis krainaŭ, jakija paciarpieli ad dziejańniaŭ kiberšpijonskaj sietki NetTraveler. Jak paviedamlajuć eksperty antyvirusnaj kampanii «Labaratoryja Kaśpierskaha», jakija i vyjavili złamyśnikaŭ, NetTraveler ŭmiašałasia ŭ pracu bolš za 350 kamputarnych systemaŭ u 40 krainach śvietu (najbolš — Manholii, Rasiei i Indyi).
Havorka idzie pra kiberataki jak na pryvatnyja, tak i na dziaržaŭnyja struktury, u tym liku na ŭradavyja ŭstanovy, ambasady, navukova-daślednyja centry i vajennyja arhanizacyi. Pavodle raśśledavańnia, špijonskaja kampanija startavała jašče ŭ 2004 hodzie, adnak najbolšuju aktyŭnaść złamyśniki razharnuli na praciahu apošnich troch hadoŭ. «U apošni čas u sferu intaresaŭ złamyśnikaŭ trapili takija haliny, jak asvajeńnie kosmasu, nanatechnalohii, enerhietyka (u tym liku i jadziernaja), medycyna i telekamunikacyi», — havorycca ŭ paviedamleńni «Labaratoryi Kaśpierskaha».
Zaražeńnie kamputaraŭ adbyvałasia z dapamohaj fišynhavaha lista — paviedamleńnia na elektronnuju poštu, meta jakoha — atrymańnie dostupu da kanfidencyjnych dadzienych karystalnika.Dla hetaha ŭ NetTraveler vykarystoŭvali niedachopy ŭ Microsoft Office. Pavodle acenak «Labaratoryi Kaśpierskaha», abjom vykradzienych dadzienych na ŭsich serverach NetTraveler skłaŭ kala 22 hihabajtaŭ. Heta, naprykład, pieraliki systemnych fajłaŭ, a taksama zapisy kambinacyjaŭ na klavijatury.
Apošnija niekalki hadoŭ maštaby kiberšpijanažu nabyvajuć niebiaśpiečnyja maštaby. Hieneralny sakratar Paŭnočnaatlantyčnaha aljansu Anders Foh Rasmusen u svaim artykule ŭ The Wall Street Journal naahuł napisaŭ, što «nastupnaja vajna NATA — u kiberprastory».Jon pryvioŭ prykład, kali 23 krasavika roŭna za 7 chvilinaŭ biržavy indeks Dow Jones upaŭ na 150 punktaŭ, vyklikaŭšy šmatmiljardnyja straty. Da chvalavańniaŭ na biržy pryviało... paviedamleńnie ŭ Twitter-akaŭncie ahienctva Associated Press, nibyta ŭ Biełym domie adbylisia vybuchi.
Infarmacyja apynułasia iłžyvaj, bolš za toje — jana nie była pamyłkaj žurnalistaŭ z Associated Press. Jany ŭvohule jaje nie pisali — heta zrabili chakiery, jakija paźniej nazvalisia «Syryjskaj elektronnaj armijaj». «Indeks adnaviŭsia imhnienna. Ale ŭrok vidavočny: adzin tvit całkam moža paciahnuć za saboj krach ekanomiki», — piša Rasmusen.
Hienieralny sakratar NATO pryvioŭ dadzienyja Eŭrapołu, u jakim paličyli, što kryminalnaja kiberaktyŭnaść štohod nanosić karparacyjam straty na sumu bolš za tryljon dalaraŭ. Kamputarnyja virusy mohuć spyniać pracu AES, mižnarodnych aeraportaŭ i enerhasystemaŭ.
Metadam procidziejańnia złačynnaści ŭ kiberprastory ŭ NATA hatovyja navučyć admysłoŭcaŭ ź luboj krainy. Tak piša Rasmusen. Jon nazyvaje kiberataki hlabalnym vyklikam, ź jakim treba hetaksama hlabalna zmahacca. Čaćviortaha červienia ministry abarony krainaŭ-čalcoŭ NATO damovilisia, što da vosieni pavinny raspracavać ahulny plan baraćby ź internet-złačyncami.
