Biełaruś i Ukraina padpisali pratakoł ab abmienie ratyfikacyjnymi hramatami ab dziaržaŭnaj miažy ad 12 maja 1997 hoda.
Podpisy pad dakumientam u prysutnaści prezidentaŭ dźviuch krain siońnia pastavili ministr zamiežnych spraŭ Biełarusi Uładzimir Makiej i pieršy namieśnik ministra zamiežnych spraŭ Ukrainy Rusłan Dziemčanka.
Damova ab miažy pamiž Biełaruśsiu i Ukrainaj była padpisana ŭ 1997 h. Nieŭzabavie jaje ratyfikavaŭ ukrainski bok, adnak biełarusy z ratyfikacyjaj nie śpiašalisia. Minsk uviazvaŭ zaćviardžeńnie dakumienta z vypłataj doŭhu ŭkrainskich pradpryjemstvaŭ pierad Biełaruśsiu (havorka idzie pra zapazyčanaść, nazapašanuju jašče ŭ savieckija časy). Ukrainskija ŭłady płacić admaŭlalisia.
Pierśpiektyva vyrašeńnia sprečki źjaviłasia ŭ 2009 hodzie. Ukraina tady, jak adznačaje «Dzierkało tižnia», prapanavała Minsku šerah kampiensacyjnych schiem: u pryvatnaści, paabiacała, što hrošy, jakija vydzialajucca Jeŭrasajuzam na ŭładkavańnie miažy, jana budzie tracić mienavita na miažu ź Biełaruśsiu. Biełaruskamu boku taksama byli abiacanyja źnižki na ŭkrainskuju elektraenierhiju.
U vyniku parłamient Biełarusi ratyfikavaŭ damovu ab miažy. Adnak pahadnieńnie ŭsio roŭna nie ŭstupiła ŭ siłu, bo baki nie abmianialisia ratyfikacyjnymi hramatami. Pa dadzienych vydańnia, heta było źviazana z dadatkovymi patrabavańniami biełaruskaha boku.
Ciapierašnija damoŭlenaści pamiž Kijevam i Minskam, pa źviestkach krynicy, uklučajuć u siabie praduhledžanyja raniej źnižki na ŭkrainskuju elektraenierhiju, a taksama pastaŭki na Ukrainu biełaruskaj sielhastechniki, jakaja budzie apłačvacca častkova za košt bankaŭskich kredytaŭ.
Kamientary