Vasilu Parfiankovu pahražaje novy turemny termin

Vasilu Parfiankovu, fihurantu kryminalnaj spravy ab masavych biesparadkach u Minsku 19 śniežnia 2010 hoda, aficyjna pradjaŭlena abvinavačańnie pavodle artykuła 421 Kryminalnaha kodeksa (nievykanańnie patrabavańniaŭ previentyŭnaha nahladu). Pra heta jaho 12 lipienia prainfarmavaŭ śledčy Pieršamajskaha RUUS Minska, jaki viadzie hetu spravu.

Nahadajem, u kancy červienia Parfiankova vyklikali ŭ Pieršamajskaje RUUS, dzie paviedamili, što suprać jaho raspačata čarhovaja — treciaja pa liku — kryminalnaja sprava za parušeńnie patrabavańniaŭ previentyŭnaha nahladu. U hutarcy sa śledčym jon zaŭvažyŭ, što pavodle zakona dla raspačynańnia kryminalnaj spravy nieabchodna mieć try parušeńni, a ŭ jaho tolki ich dva. Śledčy adkazaŭ, što «dva parušeńni — heta ŭžo sistema, i inśpiektar ubačyŭ u hetym padstavu dla raspačynańnia spravy».

Parušeńni zaklučalisia ŭ tym, što adzin raz Vasil vyjšaŭ u nienaležny čas u mahazin, a druhi — trochi spaźniŭsia damoŭ. Mienavita ŭ hetyja momanty jaho prychodzili praviarać supracoŭniki milicyi.

Ciapier Parfiankoŭ znachodzicca pad padpiskaj ab niavyjeździe. Pavodle jaho słoŭ, 15 lipienia jamu naležyć źjavicca ŭ RUUS dla aznajamleńnia sa spravaj, jakaja potym budzie pieradadziena ŭ sud. Paśla sudovaha pasiadžeńnia, jakoje, jak čakajecca, adbudziecca prykładna praź miesiac, budzie padadziena kasacyjnaja skarha.

Parfiankovu pahražaje aryšt na paŭhoda ci pazbaŭleńnie voli da adnaho hoda. «Viny svajoj ja nie pryznaŭ, tamu, dumaju, što prysud budzie žorstki. Ale ja da hetaha hatovy, mianie heta nie pałochaje. Kali treba, to daviadziecca jašče raz źjeździć u turmu», — zajaviŭ jon.

***

Vasil Parfiankoŭ byŭ pieršym, kaho asudzili pa spravie ab padziejach 19 śniežnia 2010 hoda. U lutym 2011 hoda sud Frunzienskaha rajona Minska pryznaŭ jaho vinavatym va ŭdziele ŭ masavych biesparadkach i pryhavaryŭ da čatyroch hadoŭ pazbaŭleńnia voli z adbyvańniem pakarańnia ŭ kałonii strohaha režymu. Akramia taho, Parfiankoŭ pavinien byŭ vypłacić bolš jak 14 młn. rubloŭ za raźbitaje škło dźviarej u Domie ŭrada padčas niesankcyjanavanaj akcyi apazicyi. U žniŭni 2011 hoda jon byŭ pamiłavany ŭkazam prezidenta.

5 studzienia 2012 hoda za Parfiankovym ustanavili prafiłaktyčny nahlad, a ŭ krasaviku Śledčy kamitet Pieršamajskaha rajona Minska raspačaŭ u dačynieńni da jaho novuju kryminalnuju spravu — za parušeńnie ŭmoŭ prafiłaktyčnaha nahladu. U mai 2012 hoda sud Pieršamajskaha rajona pryznaŭ Parfiankova vinavatym u parušeńni ŭmoŭ prafiłaktyčnaha nahladu i pryhavaryŭ da šaści miesiacaŭ aryštu. U žniŭni Parfiankova etapavali ŭ aryštny dom u Baranavičy, dzie jon i adbyvaŭ pakarańnie.

Vyjšaŭšy na volu ŭ pačatku lutaha hetaha hoda, Parfiankoŭ zajaviŭ, što maje namier praciahvać hramadskuju dziejnaść, «padtrymlivać biełaruski ruch». U krasaviku sud Pieršamajskaha rajona Minska aštrafavaŭ jaho na vosiem bazavych vieličyń za parušeńnie režymu previentyŭnaha nahladu. 17 maja hety ž sud iznoŭ asudziŭ Parfiankova za parušeńnie pravił previentyŭnaha nahladu, aštrafavaŭšy jaho na try miljony rubloŭ.

• 0
• 0
• 0
• 0
• 0
• 0
• 0
• 0