«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami

Hałoŭny redaktar Reform.news Fiodar Paŭlučenka padzialiŭsia svaimi ŭražańniami ad sustrečy z Maryjaj Kaleśnikavaj u Bierlinie.

Jon patłumačyŭ, što šerah biełaruskich žurnalistaŭ atrymali zaprašeńni ad Maryi Kaleśnikavaj sustrecca.

«Pieršapačatkova heta apisvałasia jak zaprašeńnie na harbatu, paznajomicca, abmianiacca dumkami, uražańniami, i ja prykładna z takim nastrojem jechaŭ na hetuju sustreču. (…) A astatnija kalehi čamuści pryjechali prosta zaradžanyja na intervju», — dzielicca Paŭlučenka.

«Naša Niva» atrymała padobnaje zaprašeńnie, adnak paličyli prapanavany farmat — 15 chvilin razmovy ŭ Bierlinie z kožnym biełaruskim miedyja paśla šmathadzinnaj hutarki Kaleśnikavaj z rasijskim błohieram Juryjem Dudziom — niedarečnym.

Paŭlučenka zaŭvažaje, što tak i nie zrazumieŭ farmat hetaj sustrečy, i adznačaje, što padčas razmovy «ničoha novaha, zvyšnaturalnaha» Maryja Kaleśnikava nie skazała.

«Jana była ŭ mascy»

Sa słoŭ Paŭlučenki, u jaho skłałasia ŭražańnie, što Kaleśnikava była dobra padrychtavanaja da sustrečy, i jon nie skazaŭ by, što jana była całkam ščyraja.

«U čałavieka, jaki daŭno ŭ palitycy, jość maska. Voś jana była ŭ mascy. Uśmiešlivaja, nibyta adkrytaja, ale za hetym usim chavaŭsia niejki ciažar. Napružanaść była. (…) Ja, va ŭsiakim razie, ludziej niejak adnosna čytaju. Jana nie vyhladała ščyraj. Jana sapraŭdy była prychilnaja, razmaŭlała, raskazvała, na ŭsie pytańni adkazvała. Ale było vidać, što jaje nibyta zabryfavali, što jana padrychtavałasia, davoli prafiesijna adkazvała».

Jak zhadvaje Paŭlučenka, litaralna ŭ niekalkich momantach jana na dolu siekundy vyjšła ź siabie, kali joj zadali niepryjemnyja pytańni. U tym liku kali spytali, ci nie škaduje jana, što byŭ dvaccaty hod, i ci nie adčuvaje adkaznaści za heta.

«Mnie spadabaŭsia jaje adkaz. I ja, u pryncypie, taksama tak na jaje miescy adkazaŭ by. Jana skazała: čamu ja pavinna naohuł na siabie heta prymać, kali mienavita Łukašenka ŭsich sadžaje? Chto ludziej mučyć, zabivaje i sadžaje, toj i vinavaty. Što značyć — «ja vinavataja?» I heta pravilny adkaz, na moj pohlad».

Što supolnaha pamiž Kaleśnikavaj i ruskimi emihrantami z Brajtan-Bič

Paŭlučenka akcentuje ŭvahu na tym, što jon zusim nie ŭbačyŭ prysutnaści «ruskaha śvietu» ŭ śvietapohladzie Maryi. Ale zaŭvažyŭ zusim inšaje.

«Ja jaje ŭbačyŭ čałaviekam biezumoŭna nie «ruskaha śvietu». Ja jaje ŭbačyŭ čałaviekam… Voś kali ludzi źjazdžajuć u emihracyju, jany fiksujucca ŭ razumieńni svajoj krainy prykładna na tym hodzie, u jakim jany źjechali. Voś jak savieckija emihranty na Brajtan-Bič. Jany ŭ 1970‑ia hady vyjechali. Dyk jany voś z hetym svaim 70‑m hodam, u pryncypie [i zastajucca] — Chazanava hladziać, Puhačovu słuchajuć. (…)

U mianie skłałasia adčuvańnie, što Kaleśnikava, kali jana vyjechała ŭ dvuchtysiačnyja, prykładna z tym adčuvańniem krainy i svaim uražańniem, jak jana bačyć krainu, i zastałasia. (…)

Voś hetaje razumieńnie i adčuvańnie krainy, mnie zdajecca, u jaje dzieści tam, niahledziačy navat na toje, što jana była ŭ 2020 hodzie tvaram pratestaŭ, što jana piać hadoŭ adsiedzieła. (…) Heta ŭsio roŭna nie mianiaje čałavieka.

Razumieńnie krainy ŭ jaje adniekul z dvuchtysiačnych».

«Maryja Kaleśnikava dla Jeŭropy — całkam arhaničny, svoj piersanaž, u došku»

Jašče adna važnaja vysnova, jakuju dla siabie zrabiŭ Paŭlučenka, analizujučy vykazvańni Kaleśnikavaj, — heta blizkaść jaje pohladaŭ da peŭnych palityčnych partyj Hiermanii.

«Usie jaje vykazvańni — humanitarny trek, nieabchodnaść pieramoŭ, luboŭ, voś heta «lubić, lubić, lubić» (jana tam novy łozunh abviaściła). Ja dumaju: što mnie heta nahadvała? Nu jaki «ruski śviet»? Heta nie «ruski śviet». A mnie heta nahadała levych u Hiermanii. (…)

Typu sacyjał-demakraty Hiermanii. Z usim hetym pacyfizmam, z usioj hetaj zialonaj enierhietykaj, levymi prahramami, antyvajennymi ŭsiakimi štukami. Što davajcie lepš siabravać, lubić, a nie vajavać. I zhodnickija pazicyi časam, za jakija krytykavali papiaredni ŭrad Hiermanii šmatrazova.

Pavialičyć

Voś heta ŭ čystym vyhladzie Maryja Kaleśnikava. I heta prosta, nu jak by kroŭ ad kryvi, płoć ad płoci».

Paŭlučenka tłumačyć, što dla Maryi jak čałavieka śfiery kultury taki levy paradak arhaničny.

Žurnalist zhadvaje, što i raniej kazaŭ: u Kaleśnikavaj vialikija pierśpiektyvy ŭ niamieckaj palitycy.

«Jakraz być častkaj levaha ruchu. Levaha — u sensie sacyjał-demakratyčnaha ruchu. Nie lavackaha, a mienavita sacyjał-demakratyčnaha. I mnie zdajecca, što jaje treba mienavita tak usprymać. (…) Jaje palityčny bekhraŭnd, jaje palityčnyja pohlady — jany pra sacyjał-demakrataŭ Hiermanii dvuchtysiačnych, 2010-ch».

Paŭlučenka zaŭvažaje, što, mahčyma, jaho mierkavańnie pamyłkovaje i Maryja moža heta abvierhnuć. Adnak u jaho skłałasia ŭražańnie, što «lepš za ŭsio razumieć jaje, jaje palityčnuju płatformu, pohlady — praz razumieńnie taho, što kažuć sacyjał-demakraty Hiermanii».

«Sacyjał-demakraty (…) całkam sabie mejnstrymnaja partyja. I naohuł usia Jeŭropa pa sutnaści sacyjał-demakratyčnaja. Heta značyć, Maryja Kaleśnikava dla Jeŭropy — całkam arhaničny, svoj piersanaž, u došku. Plus jana vydatna razmaŭlaje pa-niamiecku, pa-anhlijsku, lohka pieraklučajecca, razmaŭlaje jana i pa-biełarusku», — davodzić Paŭlučenka.

• 46
• 5
• 2
• 13
• 1
• 2
• 1
• 1