CT ciapier na chalavu nie zdasi: pavyšeńnie minimalnaha bała apraŭdała siabie

Užo 4 žniŭnia biełaruskija VNU skončać pryjom dakumientaŭ. Zdać centralizavanaje testavańnie (CT) sioleta pažadali kala 118 tysiač čałaviek.

Šyroki śpiektr

Dla ekśpierymienta byli vybranyja try «trojki» ispytaŭ, jakija dajuć najšyrejšyja mahčymaści dla pastupleńnia. Zdaŭšy movu, matematyku i hramadaznaŭstva možna padavać dakumienty na pravaznaŭstva ci, naprykład, u Akademiju MUS (choć tudy nieabchodna zdać jašče i ispyt pa fizpadrychtoŭcy).

Siertyfikaty pa matematycy, fizicy i movie adkryvajuć darohu dla pastupleńnia na bieźlič techničnych śpiecyjalnaściaŭ. Na niekatoryja ź ich — jak na fizičny ci miechanika-matematyčny fakultet BDU — letaś konkursu zusim nie było.

Treci papularny kirunak — fiłałohija i linhvistyka — patrabuje zdačy ispyta pa biełaruskaj ci ruskaj, zamiežnaj movie i historyi Biełarusi.

Mabyć niechta zdaŭ naŭhad, ale nie my

Kiryła Chilko: «Ja «pastupaŭ» na jurysta. Najbolš mianie cikaviła matematyka, bo sa školnaj prahramy absalutna ničoha nie pamiataju, i tamu vybiraŭ z dapamohaj dziciačaj ličyłki, kudy pastavić kryžyk. Adnak pra inšyja pradmiety taho ž nie skažu. Naŭrad ci ludzi, jakija ničoha nie vučyli, zdajuć ispyty pa humanitarnych pradmietach nie hledziačy ŭ zadańni — tam nie ličby i formuły, možna pračytać i pasprabavać vyciahnuć choć niešta z ahulnych viedaŭ.

Tamu ja vyrašyŭ imitavać siaredniestatystyčnaha nievuka: na nieprystojna lohkija zadańni pa biełaruskaj movie i hramadaznaŭstvie, jakija zvyčajna mieściacca ŭ pačatku testu, namahaŭsia adkazvać sumlenna. A dzie patrabavałasia napružvacca i dumać — naŭhad.

Vyniki atrymalisia siarednieńkija, adnak dla čałavieka, jaki zusim nie rychtavaŭsia — prosta šykoŭnyja. Udałosia navat uhadać adno zadańnie z testu častki «V» pa matematycy, dzie treba samomu ŭpisać słušny adkaz, a nie pastavić kryžyk».

Biełaruskaja mova — 40
Hramadaznaŭstva — 39
Matematyka — 11

Siarhiej Makarevič: «Ja vyrašyŭ usio zdavać naŭhad, ale vypracavaŭ admysłovuju sistemu. Kali zdavaŭ rasijskuju movu, padrychtavaŭ piać varyjantaŭ rasstaŭleńnia adznak u błanku adkazaŭ, jakija paŭtaralisia praz kožnyja piać pytańniaŭ. Darečy, rasijskaja mova była samym składanym ispytam, bo adnačasova pravilnymi mahli być niekalki varyjantaŭ adkazaŭ. Adnak usio ž udałosia nabrać minimalny bał, ź jakim užo možna padavać dakumienty ŭ VNU.

Padčas zdačy historyi Biełarusi ja staviŭ kryžyki «leśvicaj»: ad pieršaha da piataha adkazu, a potym uvierch. I atrymaŭ niadrenny vynik u 32 bały. Adnak pa anhlijskaj movie z «advarotnaj leśvičkaj», kali pačynaŭ ź piataha adkazu, dachodziŭ da pieršaha i hetak dalej, zmoh nabrać tolki 16 bałaŭ».

Anhlijskaja mova — 16
Rasijskaja mova — 10
Historyja Biełarusi — 32

Juraś Uskoŭ: «Zdavać niešta naŭhad było soramna. Tamu ź biełaruskaj movaj uźnikła prablema, jakaja vyrašyłasia nastupnym čynam. Ja rašyŭ uvieś test na čarnaviku, paśla čaho zapoŭniŭ błank da siaredziny słušnymi, na moj pohlad, adkazami, a reštu ŭžo tak, jak mnie chaciełasia: dapamahła kniha «Arnamienty narodaŭ śvietu».

Što da fiziki i matematyki, to tut prablem nie ŭźnikała — zadačy ab prykručanym da stoli šaryku, jaki dla niečaha raskrucili i prapanujuć niešta vyličyć, zaŭsiody vyklikali ŭ mianie nierazumieńnie: sami raskrucili, sami vyličvajcie. Pakolki abodva pradmiety vymahajuć tolki pa adnym adkazie na pytańnie, daviałosia advolna stavić «ptušački»».

Biełaruskaja mova — 42
Matematyka — 10
Fizika — 11

«Siurpryz» ad Minadukacyi

Dla kahości napisać CT paśpiachova — značyć nabrać nie mienš za 70—80 bałaŭ. Adnak kali pastupleńnie dziela «korački» i admysłovaj padrychtoŭki da CT nie było, pakazčykam paśpiachovaści moža być pieraadoleńnie minimalnaha bała.

Sioleta Ministerstva adukacyi, reahujučy na patrabavańni hramadskaści, značna pavialičyła parohavy bał. Ciapier zamiest minimalnych siami bałaŭ pa ŭsich pradmietach abituryjent musiŭ nabrać minimum 10 bałaŭ pa biełaruskaj ci ruskaj movie, 15 bałaŭ pa fizicy, matematycy, bijałohii dy chimii, a taksama 20 bałaŭ pa inšych pradmietach.

Heta značna sapsavała statystyku: minimalny bał sioleta nie zmahli pieraadoleć rekordnyja 40 tysiač abituryjentaŭ — bolš za tracinu tych, chto zdavaŭ testy.

Pakul śpiecyjalisty ŭchvalajuć rašeńnie ab pavieličeńni minimalnaha bała, a VNU kanstatujuć niedabor studentaŭ, «mietad tyčka» dla zdačy CT stanovicca ŭsio mienš aktualnym. Adna sprava nabrać 7 bałaŭ, a voś nabrać 20 — zusim inšaja. Voś i karespandenty «NN» uvajšli ŭ tyja 40 tysiačaŭ hora-abituryjentaŭ, mnohija ź jakich jašče mahli pastupić u minułym hodzie, a ŭ hetym nie zmohuć.

• 0
• 0
• 0
• 0
• 0
• 0
• 0
• 0