Pres-sakratar minskaj milicyi «vyciahnuŭ ź piatli» achviaru «palaŭničych na piedafiłaŭ». Budzie sprava
Abaraniać intaresy paciarpiełaha budzie Dźmitryj Lepretar, advakat rasstralanaha Dźmitryja Kanavałava.
Tak zvanyja «palaŭničyja» na piedafiłaŭ złavili ŭ Minsku hieja, jakoha zaprasili na sustreču ad imia 15-hadovaha chłopčyka. U pierapiscy ŭ sacyjalnych sietkach abmiarkoŭvałasia i mahčymaść seksu pamiž imi. Sustreła ž hieja hrupa dužych pacanoŭ.
Eduard — invalid 3-j hrupy. Što jon naležyć da seksualnych mienšaściaŭ, jon nie chavaŭ. Ale z chłopca ździekavalisia, i ŭsio heta zapisali na kamieru. Paśla videa vykłali ŭ internecie. Tolki kali pra namier dapamahčy Eduardu pryciahnuć napadnikaŭ da adkaznaści vykazaŭsia pres-sakratar minskaj milicyi Alaksandr Łastoŭski, videa pačali «padčyščać».
«Ja praktyčna vyciahnuŭ Eduarda ź piatli, — raskazvaje Alaksandr Łastoŭski — Ja parazmaŭlaŭ z Eduardam, jon pačuvajecca lepš. Udałosia svoječasova ŭmiašacca».
Łastoŭski zaŭvažyŭ, što vystupaje jak pryvatnaja asoba, chacia i pracuje ŭ milicyi.
Łastoŭski dapamoh Eduardu znajści advakata. Heta budzie Dźmitryj Lepretar, jaki abaraniaŭ Dźmitryja Kanavałava — katoraha ŭ vyniku rasstralali za vybuch u minskaj padziemcy. Pakul jany nie vyznačyli, kudy buduć padavać zajavy.
Łastoŭski nie vyklučaje, što budzie padrychtavany pazoŭ na zadavalnieńnie maralnaj škody.
«Moj udzieł na hetym skančajecca — niama paŭnamoctvaŭ. Ja najpierš žurnalist ŭ pahonach», — skazaŭ Łastoŭski.
Łastoŭski źviartaje ŭvahu, što nielha čynić samasud. Złačyncam čałavieka moža pryznać tolki sud.
Sa studzienia pa maj było zaviedziena 15 kryminalnych spravaŭ pa artykułach za piedafilstva. Ale Łastoŭski padkreślivaje, što heta zasłuha milicyi i inšych pravaachoŭnych orhanaŭ. Niama nivodnaha vypadku, kali dziejnaść «piedafilajcaŭ» pryviała da jurydyčnaha pośpiechu. Łastoŭski raskazvaje, što adnojčy byŭ pasiarednikam pamiž pravaachoŭnikami i podobnaj hrupaj, kab supolna pracavać. Ale «palaŭničyja» admovilisia. Na dumku pres-sakratara HUUS Minharvykankama, značycca, ich namiery nie takija i dobryja.
«Treba pisać zajavy ŭ pravaachoŭnyja orhany», — raić Łastoŭski asobam, jakija trapili ŭ padobnyja situacyi.
Ciapier čytajuć
«Kałaŭra my nie pakryŭdzili»: stała viadoma pra novaje miesca pracy byłoha staršyni Nacbanka3
Kamientary