Alaksandr Łukašenka vyzvaliŭ ad pasady člena Centrvybarkama Antona Huščyna. Adpaviedny ŭkaz byŭ padpisany 17 vieraśnia, paviedamlaje pres-słužba prezidenta.
Jak patłumačyŭ sakratar CVK Mikałaj Łazavik, vyzvaleńnie ad pasady člena CVK Huščyna źviazana ź jaho pierachodam na pasadu staršyni Kobrynskaha suda. «Pakolki ŭ sudach razhladajucca skarhi ŭdzielnikaŭ vybarčaha pracesu, to, napeŭna, było b niapravilna, kali b sudździa adnačasova źjaŭlaŭsia i arhanizataram vybaraŭ. Huščyn sam napisaŭ zajavu ab składańni ź siabie paŭnamoctvaŭ člena CVK», — paviedamiŭ jon.
Łazavik taksama adznačyŭ, što ŭ Centrvybarkamie Huščyn pracavaŭ niadoŭha — sa śniežnia 2011 hoda, źjaŭlajučysia na toj čas pieršym namieśnikam načalnika hałoŭnaha ŭpraŭleńnia justycyi Bresckaha abłvykankama. «Jon zarekamiendavaŭ siabie daśviedčanym jurystam, dobrym tavaryšam. Pryznačeńnie na pasadu sudździ było dla jaho žadanym», — skazaŭ jon.
Takim čynam, ciapier u Centrvybarkamie vakantnyja dva miescy.
Jak paviedamlałasia raniej, člen CVK, načalnik adździeła pa rabocie z kadrami RUP «Minsk Kryštal» Śviatłana Chinievič była zabitaja. Jaje cieła z množnymi kołata-rezanymi ranieńniami było znojdziena 4 žniŭnia. Padazrony — raniej nie sudzimy, žyŭ u adnym padjeździe z zahinułaj. Mužčyna źjaŭlajecca narkazaležnym, jon uziaty pad vartu.
Zakanadaŭstva praduhledžvaje pierapryznačeńnie abo pieraabrańnie členaŭ CVK, jakija vybyli ź jaho składu pa tych ci inšych pryčynach, ale terminy praviadieńnia hetaj pracedury nie ahavoranyja.
Kamientary