Viadomyja biełarusy-błohiery raskazali, jak nabyli dom u Partuhalii. Svoj dom mary ŭ Biełarusi im daviałosia pradać

Historyja papularnaha jutub-kanała «Vadim Key» pačynałasia z maštabnaha prajekta KeyDOM — sučasnaha doma ź vialikimi voknami kala lesu, jaki para budavała pa ŭłasnym prajekcie. U mai 2020 hoda siamja pierajechała tudy, ale ščaście doŭžyłasia niadoŭha. Paśla karotkaha źniavoleńnia Vadzima ŭ mai 2021 hoda za ŭdzieł u pratestach 2020-ha, Klučniki pakinuli krainu.

Za hady vandrovak siamja paśpieła pažyć u Čarnahoryi, Polščy, Narviehii i Hiermanii. Mienavita ŭ Hiermanii, jak śćviardžaje Vadzim, jany pryniali niaprostaje rašeńnie pradać dom u Biełarusi, kab puścić karani na novym miescy. Vybrany byŭ partuhalski Portu.

Błohiery vyznačyli dla siabie čatyry kryteryi: dom pavinien być asobnym (nijakich taŭnchausaŭ), mieć ułasny ŭčastak ziamli, znachodzicca kala Portu ŭ dobraj pierśpiektyŭnaj łakacyi i mieć patencyjał dla rekanstrukcyi.

U novym vypusku para padrabiaźniej raskazała pra pakupku. Pry pošuku doma jany sutyknulisia z asablivaściami miascovaha rynku: časta pryhožy dom moh stajać na vulicy, dzie susiednija budynki — heta sucelnyja ruiny. Akramia taho, damy-taŭnchausy 70—80‑ch hadoŭ płoščaj pad 300—400 kvadratnych mietraŭ pałochali dziŭnymi płaniroŭkami, dzie bolšuju častku płoščy zajmali biaskoncyja kalidory.

U vyniku błohiery spynilisia na abjekcie, jaki mnohija pakupniki prosta ihnaravali z-za drennych fotazdymkaŭ u abjavie. Heta akazałasia «Kinta» — tradycyjnaja partuhalskaja siadziba. Pry hetym jana mieścicca ŭ miežach horada.

Pavialičyć

Na 15 sotkach ziamli raźmiaściŭsia dom ahulnaj płoščaj 240 kvadratnych mietraŭ (dva pavierchi pa 120 kv. m), asobny haraž i maleńki domik sadoŭnika płoščaj kala 50 kv. m.

Niahledziačy na toje, što budynak patrabuje surjoznaha ramontu, Alesia adznačaje, što adrazu ŭbačyła ŭ starym domie na zarosłym učastku budučy ŭtulny dom.

Asabliva novych uładalnikaŭ uraziŭ sad. Na ŭčastku rastuć limony, avakada, mandaryny i vielizarnyja drevy churmy. Ale hałoŭnym siurpryzam stała mahnolija, pra jakuju Alesia maryła jašče ŭ Minsku.

Na prahlad doma błohiery zaprasili prafiesijnaha inžyniera, jaki pravieryŭ dom na najaŭnaść «fundamientalnych ran», što niemahčyma vypravić. Vierdykt śpiecyjalista byŭ stanoŭčy: dom zrobleny dobrasumlenna, ź jakasnych materyjałaŭ, i surjoznych kanstruktyŭnych prablem nie maje.

Praces nabyćcia nieruchomaści ŭ Partuhalii

Praces nabyćcia nieruchomaści ŭ Partuhalii mocna adroźnivajecca ad biełaruskaha i składajecca ź niekalkich etapaŭ.

Paśla taho, jak dom abrany, zaklučajecca damova, pavodle jakoj pakupnik unosić depazit — u vypadku Klučnikaŭ heta byli 20% ad koštu.

Hrošy na kuplu pieravodziacca nie naŭprost pradaŭcu, a na śpiecyjalny rachunak jurysta, jaki vystupaje harantam. Mienavita juryst vypisvaje fizičny bankaŭski ček, jaki pieradajecca ŭ momant padpisańnia finalnaj damovy.

Pa słovach błohieraŭ, finalnaja ździełka ŭ nataryusa niekalki razoŭ adkładałasia, adnojčy jana sarvałasia z-za ahulnanacyjanalnaj zabastoŭki padatkovaj słužby.

Nie abyšłosia i biez kurjozaŭ: paśla padpisańnia papier Vadzim i Alesia vypadkova źjechali z klučami, zabyŭšysia pieradać pradaŭcu bankaŭski ček. Daviałosia terminova viartacca.

Pavialičyć

Što dalej buduć rabić z domam

Błohiery padkreślivajuć, što nie źbirajucca adnaŭlać dom u histaryčnym styli. Heta budzie sučasnaje žyllo. Dla siamji hetaja kupla stała simvałam zakančeńnia doŭhaha pieryjadu niavyznačanaści.

«Hety dom — jak našaje žyćcio. Takija razvaliny trochi. Heta taki terapieŭtyčny efiekt — voś z hetych razvalin zrabić niešta kłasnaje. Byccam by dać sabie šaniec na niešta novaje. Nie z čystaha lista, a z vypraŭleńniem niejkich ranaŭ, kasiakoŭ. Ja ŭpeŭniena, što my pryjdziem da niejkaha kłasnaha varyjanta. (…) Kali ja pryjšła siudy, ja adčuła, što ŭ mianie znoŭ ziamla pad nahami. Byccam by ty znoŭ staiš na svajoj ziamli», — kaža Alesia ŭ videa.

Vadzim dadaje: «Heta nie sproba viarnuć niešta stračanaje, viarnuć minułaje albo zrabić, jak było raniej. Nie, my chočam pabudavać niešta novaje. My ŭžo inšyja, čas źmianiŭsia, dzieci vyraśli. (…) My nie chočam žyć minułym. My chočam stvarać niešta ciapier i atrymlivać ad hetaha asałodu».

Napieradzie ŭ siamji Klučnikaŭ — vialikaja budoŭla, jakuju jany płanujuć padrabiazna pakazvać na svaim kanale, jaki za čas ich emihracyi vyras u siem razoŭ i naličvaje ŭžo bolš za 740 tysiač padpisčykaŭ.

• 25
• 3
• 4
• 5
• 0
• 1
• 0
• 0