Prezident Ilcham Alijeŭ hałasavaŭ na adnym z učastkaŭ Sabailskaj vybarčaj akruhi, stvoranaj u škole, dzie jon raniej sam vučyŭsia. Jaho supravadžała pryhažunia-žonka Miechryban Alijeva.
Apranutaja jana była ź ihołački, na vysokich abcasach, u karotkaj, vyšej kalen, sukiency.
Hałasavańnie pačałosia ŭ Azierbajdžanie a 08:00 pavodle miascovaha času (06:00 pavodle Minska), jano zavieršycca a 17-j pavodle minskaha času.
Na sioletnich vybarach Ilcham Alijeŭ bałatujecca na čarhovy, treci pa liku termin. Takuju mahčymaść jamu dajuć papraŭki ŭ kanstytucyju.
Aproč Alijeva ŭ vybarach, jak i ŭ Biełarusi ŭ 2010 h., udzielničajuć dzieviać kandydataŭ, u tym liku pradstaŭnik apazicyjnaha aljansu Nacyjanalnaja rada demakratyčnych sił historyk Džamil Hasanły.
Kandydat budzie ličycca pieramožcam u pieršym ža tury, kali nabiare bolš za 50% hałasoŭ.
Ilcham Alijeŭ kiruje krainaj z 2003 hoda. Na hetaj pasadzie jon źmianiŭ svajho baćku Hiejdara. Pieršyja vybary ź jahonym udziełam skončylisia pratestami na vulicach Baku i žorstkim razhonam mitynhu.
Apošnija vybary adbylisia ŭ 2008 hodzie. Tady apazicyja bajkatavała vybary, a Ilcham Alijeŭ, pavodle aficyjnych źviestak, atrymaŭ kala 89% hałasoŭ.
Apazicyja vyłučała kandydatam kinascenarysta Ibrahimbiekava, adnak jaho nie zarehistravali, bo jon maje dvajnoje — rasijskaje i azierbajdžanskaje — hramadzianstva. Tady na zamienu jamu apazicyja vyłučyła ścipłaha intelektuała Hasanły.
Hasanły zasłužyŭ viadomaść svaimi pracami pra časy Azierbajdžanskaj Demakratyčnaj Respubliki, sučaśnicy BNR.
Jon nie nadta charyzmatyčny, a da taho ž — invalid 3-j hrupy pa zroku, praz nastupstvy cukroŭki. Apazicyja zrabiła staŭku na jaho, bo heta niejtralny i sumlenny čałaviek, u spadziavańni, što mienavita takaja postać najlepš kantrastuje z sułtanskim stylem kiravańnia Alijevych.
Palityčny ład Azierbajdžana aŭtarytarny. U krainie isnuje lehalnaja apazicyja, adnak jaje mahčymaści krajnie abmiežavany. Asnoŭnyja ŚMI kantraluje režym. Dziaržava faktyčna pryvatyzavanaja hrupoŭkaj i siamjoj Alijeva.
Pry hetym, adnak, kraina padpisała dakumienty Rady Jeŭropy i padparadkoŭvajecca rašeńniam Jeŭrapiejskaha suda pa pravach čałavieka.
Kamientary