U Dziaržaŭnym pamiežnym kamitecie rychtujecca sud nad majoram Alaksiejem Kaściukova. U pačatku vieraśnia ŭ Smarhonskaj pahranatradzie prymali štohadovyja zaliki pa ideałahičnaj pracy i taktycy pamiežnaj słužby. Supracoŭnik 3-ha adździeła słužby apieratyŭnaj dziejnaści major Kaściukoŭ ad prachodžańnia zalikaŭ admoviŭsia.
9 listapada ŭ jaho kančajecca kantrakt, jaki jon vyrašyŭ nie praciahvać. Major užo prajšoŭ atestacyjnuju kamisiju pierad zvalnieńniem, jakaja dazvoliła jamu zvolnicca, i źbiraŭsia spakojna pakinuć šerahi pamiežnikaŭ. Ad vykanańnia svaich słužbovych abaviazkaŭ Alaksiej Kaściukoŭ nie admaŭlaŭsia, ale zaliku pa ideałohii vyrašyŭ praihnaravać. Za što atrymaŭ strohuju vymovu ad kamandzira.
Zdavałasia b, na hetym niepryjemnaści dla aficera, jaki sabraŭsia na dembiel, pavinny byli skončycca. Adnak praz dva tydni paśla incydentu kamandzir vajskovaj čaści 2044 pałkoŭnik Laŭda raspačaŭ suprać majora Kaściukova kryminalnuju spravu. Majora abvinavacili ŭ ździajśnieńni voinskaha złačynstva — artykuł 438, č.1 Kryminalnaha kodeksa.
Spravu pieradali ŭ Śledčy kamitet. Majora ŭžo niekalki razoŭ vyklikali na dopyty. Pakazańni na Kaściukova daŭ jaho niepasredny načalnik — načalnik słužby apieratyŭnaj dziejnaści major Strapko.
U majora Strapko pastajanna ŭźnikali kanflikty z padnačalenym — majoram Kaściukova. Apošni krytykavaŭ dziejańni Strapko.
Major Kaściukoŭ pakul ustrymlivajecca ad kamientaroŭ. Jon ličyć siabie absalutna nievinavatym i kaža, što jamu chočuć adpomścić za zvalnieńnie z pahrankamiteta i krytyku na adras majora Strapko.
U majora Kaściukova dvoje maleńkich dziaciej.
