Linkiavičus: Sankcyi ES efiektyŭnyja i musiać prymianiacca razam z palityčnym dyjałoham
Pra heta zajaviŭ ministr zamiežnych spraŭ Litvy Linas Linkiavičus, adkryvajučy dyskusiju ab efiektyŭnaści palityki sankcyj 18 listapada ŭ Brusieli, paviedamlaje BiełaPAN.
«Za apošnija dziesiacihodździ Jeŭrapiejski sajuz ad usieahulnaha embarha pierajšoŭ da prymianieńnia raźmieranych sankcyj, i jany źjaŭlajucca tolki adnym ź instrumientaŭ źniešniaj palityki ES.
My imkniemsia nie tolki prymianiać sankcyi, ale i padtrymlivać palityčny dyjałoh, tamu što taki dvajny padychod zvyčajna apraŭdvaje siabie», — pryvodzić pres-słužba MZS Litvy słovy Linkiavičusa.
Litva jak staršynia Savieta ES praviała debaty na temu «Ci dziejničajuć sankcyi ES?» sumiesna ź instytutam navukovych daśledavańniaŭ European Policy Center.
Było prezientavana daśledavańnie čatyroch režymaŭ sankcyj — u Biełarusi, Iranie, Mjanmie i Siryi.
Linkiavičus adznačyŭ: «Za apošnija dva hady značna pavialičyŭsia ŭzrovień sankcyj ES. Ciapier jany bolš dakładnyja, časta skiravany suprać najbolš važnych halinaŭ.
My pavinny pierahledzieć ich upłyŭ, ale acenku nieabchodna arhumientavać vynikami, a nie kolkaściu asob abo pradpryjemstvaŭ, jakija padlahajuć sankcyjam».
Ministr pryznaŭ, što sankcyi niepaźbiežna buduć upłyvać na ekanomiku ES, ale łahičnaje ich prymianieńnie nie pieraškodzić rostu handlu ź niekatorymi krainami.
Jon zaklikaŭ ES da bolš ciesnaj kaardynacyi dziejańniaŭ pamiž ustanovami ES i dziaržavami-členami.
Jak adznačaje pres-słužba, siarod najbolš častych mier — zabarona na ekspart zbroi, ekanamičnyja i finansavyja abmiežavańni, zabarona na ŭjezd na terytoryju ES, zamarožvańnie srodkaŭ asob i pradpryjemstvaŭ na terytoryi ES.
U dyskusii ŭdzielničali kaardynatary Dziaržaŭnaha departamienta ZŠA Den Fryd i Ministerstva zamiežnych spraŭ Šviecyi Per Sałand, pradstaŭniki instytutaŭ ES i ŭstanoŭ dziaržaŭ-členaŭ, niaŭradavych arhanizacyj, dziełavych kołaŭ, ŚMI, ekśpierty.
Saviet Jeŭrasajuza ŭ kancy kastryčnika praciahnuŭ da 31 kastryčnika 2014 hoda dziejańnie «abmiežavalnych mier» u dačynieńni da ŭładaŭ Biełarusi.
Saviet ES pakinuŭ u śpisie fizičnych i jurydyčnych asob, jakim zabaronieny ŭjezd u ES i čyje aktyvy na terytoryi supolnaści zamarožany, 232 fizičnyja asoby i 25 kampanij i pradpryjemstvaŭ.
Kamientary