Majdan źviarnuŭ uvahu ŭsich na Ukrainu. Adkul u hetaj nacyi stolki žyćciovych siłaŭ? Ad kultury!
«Naša Niva» praciahvaje znajomić vas z ukrainskaj kulturaj. U minuły raz my ŭzhadali TOP-10 ukrainskich muzykaŭ, a siońnia źvierniemsia da ŭkrainskaj litaratury. Redakcyja vykazvaje padziaku staršyni Biełaruskaha PEN-Centra Andreju Chadanoviču za dapamohu ŭ składańni śpisa.
Siarhiej Žadan
Amatary jahonaj tvorčaści lubiać spračacca, što ŭ Žadana atrymlivajecca lepiej – vieršy albo proza, adnak vidavočna, što i toje, i toje – častka adnaho cełaha. Voś tut možna pračytać raman «Depieš Mod» u pierakładzie Taćciany Urubleŭskaj, a tut — znajści vydatnuju padborku vieršaŭ u pierakładzie Andreja Chadanoviča.
Vystupaŭ u muzyčnym hurcie «Sabaki ŭ kosmasie». U 2004 arhanizavaŭ Majdan u svaim rodnym Charkavie, centry ŭschodniaj Ukrainy.
Juryj Andruchovič
Jašče adzin sučasny kłasik, aŭtar kultavych dla Ukrainy «Rekreacyj», «Maskavijady» i «Piervierzii» — ramanaŭ, u jakich postmadernizm sustrakajecca ź jeŭrapiejskaj karnavalnaj tradycyjaj. Zbornik Juryja Andruchoviča «Uroki hieahrafii» jašče možna znajści ŭ minskich kniharniach, padborku ž pierakładaŭ možna adšukać i spampavać tut.
Žyvie ŭ Ivana-Frankoŭsku na zachadzie Ukrainy. Andruchovič źviartaŭsia da Majdanu na Maršy miljonaŭ ad imia ŭkrainskaj intelihiencyi.
Aksana Zabužka
Jaje kniha «Palavyja daśledavańni ŭkrainskaha seksu» stała samaj značnaj navinkaj 1996 hoda, była pierakładziena na 10 roznych movaŭ. Aksana Zabužka napisała ŭsiaho dva ramany, ale abodva ŭžo stali znakavymi dla sučasnaj litaratury. Akramia taho, jana piša ese i litaraturaznaŭčyja manahrafii i aktyŭna ŭdzielničaje ŭ hramadskim žyćci.
Spampavać «Palavyja daśledavańni» možna tut.
Lubko Dereš
Samy małady ź litarataraŭ u našym rejtynhu – Lubko Dereš, aŭtar piaci ramanaŭ. Jahony debiutny raman «Kult» byŭ napisany, kali aŭtaru było 18 hod. Aznajomicca ź biełaruskim pierakładam možna tut.
Taras Prachaśka
Jašče adzin dziejač tak zvanaha «stanisłaŭskaha fienomienu» — hrupy piśmieńnikaŭ, što ŭzrasła ŭ abłasnym horadzie Ivana-Frankoŭsk. Pračytać jahonaje apaviadańnie «Uvabrać horad» u biełaruskim pierakładzie Ciny Davydčuk možna tut.
Vasil Hierasimiuk
Vasil Hierasimiuk pachodzić ź siamji hucułaŭ, u 1940-ja hady byŭ vyviezieny ŭ Kazachstan, ale ŭ 1950-ja viarnuŭsia.
Vydatny paet, tonki liryk, vypuściŭ dzieviać knih, trapiŭ u školnuju prahramu. Darečy, siarod inšych tvorčych zdabytkaŭ Hierasimiuka — pierakłady na ŭkrainskuju movu vieršaŭ Niaklajeva. Vydatnuju padborku vieršaŭ Hierasimiuka ŭ aryhinale možna znajści tut.
Maryja Macios
Maryja Macios na siońnia vydajecca najbolšymi va Ukrainie nakładami. Žyvie ŭ Lvovie. U 2012 stała deputatkaj Viarchoŭnaj Rady ad apazicyjnaj partyi «Udar» baksiora Klička.
