U Biełarusi pa prykmiecie połu dyskryminujucca mužčyny?

U Biełarusi dyskryminacyja pa prykmiecie połu isnuje nie tolki ŭ dačynieńni da žančyn, ale i mužčyn, zajaviła zahadčyca kafiedry technałohij kamunikacyi Instytuta žurnalistyki BDU, člen savieta HA «Žanočy niezaležny demakratyčny ruch» Iryna Sidorskaja.

Pavodle jaje słoŭ, vynikam dyskryminacyi ŭ dačynieńni da mužčyn źjaŭlajecca roźnica ŭ praciahłaści žyćcia žančyn i mužčyn, jakija ŭ Biełarusi žyvuć u siarednim na 11 hadoŭ mienš. U krainach Zachodniaj Jeŭropy hetaja roźnica nie pieravyšaje piaci hadoŭ. Śmiarotnaść mužčyn u pracazdolnym uzroście ŭ Biełarusi ŭ čatyry razy bolšaja, čym žančyn. Mužčyny ŭ šeść razoŭ čaściej za žančyn učyniajuć samahubstva.

Siarod pryčyn hetych źjaŭ Sidorskaja nazvała ałkahalizacyju mužčynskaha nasielnictva, a taksama raspaŭsiudžanaść inšych škodnych pryvyčak. Akramia taho, mienavita mužčyny čaściej za ŭsio vykonvajuć škodnuju, niebiaśpiečnuju dla zdaroŭja pracu.

Ekśpiert adznačyła, što ŭ Biełarusi 252 vidy rabot vyznačany jak škodnyja, na jakich žančyny nie mohuć być zadziejničany. Pavodle słoŭ śpiecyjalista, prajaŭleńnie hiendarnaj roŭnaści zaklučałasia b nie ŭ tym, kab dapuścić žančyn da hetych vidaŭ rabot, a ŭ tym, kab dziaržava zrabiła hetyja vytvorčaści mienš niebiaśpiečnymi dla zdaroŭja. U jakaści prykładu Sidorskaja raskazała, što kali ŭ Zachodniaj Jeŭropie žančyny pačali pracavać vadzicielami-dalnabojščykami, staŭ raźvivacca prydarožny servis i infrastruktura, a da ŭmoŭ pracy vadzicielaŭ stali vystaŭlacca bolš žorstkija patrabavańni pa biaśpiecy.

Siarod inšych faktaŭ dyskryminacyi mužčyn Sidorskaja nazvała abaviazak słužby ŭ armii, jaki raspaŭsiudžvajecca tolki na mužčyn, a taksama rozny padychod da pakarańnia za pravaparušeńni.

U pryvatnaści jana adznačyła, što ŭ Biełarusi vyšejšaja miera pakarańnia (śmiarotnaja kara) u dačynieńni da žančyn nie prymianiajecca.

U cełym, jak zaŭvažyła Sidorskaja, ad dyskryminacyi cierpiać i žančyny, i mužčyny ŭ siamji, na pracy, u palitycy. A pakolki ŭ biełaruskim zakanadaŭstvie nie vyznačana paniaćcie dyskryminacyi pa prykmiecie połu, niama vypadkaŭ sudovych razboraŭ z takoj nahody. Siarod mužčyn i žančyn taksama nazirajecca niedachop hiendarnaj adčuvalnaści. «Hramadskija ŭstanoŭki ŭ dačynieńni da mužčyn i žančyn časta abmiažoŭvajuć ich u realizacyi, advodziačy im adziny pravilna ałharytm pavodzinaŭ. Dla źmieny situacyi nieabchodna pryniać zakon ab hiendarnaj roŭnaści», — adznačyła Sidorskaja.

Hrupaj ekśpiertaŭ-jurystaŭ raspracoŭvajecca zakonaprajekt «Ab roŭnych pravach i roznych mahčymaściach mužčyn i žančyn». Pravodziacca kansultacyi i hramadskaje abmierkavańnie.

• 0
• 0
• 0
• 0
• 0
• 0
• 0
• 0