Madura pieramahaje, apazicyja zachoplivaje simvały, a dla Vieniesueły nadychodziać ciažkija časy

Pakul usia ŭvaha pryciahnuta da Majdanu, u Vieniesuele prajšli vybary, na jakich musili być abranymi hałovy 335 municypalitetaŭ krainy. Pa vynikach padliku 98% hałasoŭ vymaloŭvajecca nastupnaja karcina.

U vybarach uziali ŭdzieł 59% vieniesuelcaŭ, jakija zrabili nastupny vybar: prykładna 44% (4 584 477 hałasoŭ) vykazali padtrymku kandydatam ad Abjadnanaj sacyjalistyčnaj partyi Vieniesueły (partyja čavistych); prykładna 41% (4 252 082 hałasy) — kandydatam ad Abjadnanaha demakratyčnaha kruhłaha stała (apazicyja). Jašče 1,6% (167 049 hałasoŭ) prahałasavali za kamunistaŭ, i 13% (1 376 056) – za inšych kandydataŭ.

Pakul možna kazać, što čavistyja atrymlivajuć 196 pasadaŭ meraŭ, apazicyja – 53, astatnija – 8. Nieviadomym zastajecca vynik u 78 municypalitetach.

Takim čynam, u paraŭnańni z papiarednimi vybarami 2008 hoda, apazicyja pavialičyła kolkaść «svaich» meraŭ (tady apazicyjaniery atrymali 46 pasadaŭ). Ale jana, pakul, nie zdoleła vykanać pastaŭlenuju apazicyjnymi lidarami metu: pavialičyć hetuju ličbu ŭdvaja.

Pry hetym čavistyja pieramahajuć u sielskaj miascovaści, za apazicyjaj zastajecca pieravaha ŭ bujnych haradach. U tym liku, za apazicyjanierami zastałasia pieramoha ŭ čatyroch ź piaci municypijach Karakasa (jak i ŭ samim Karakasie), a taksama ŭ takich haradach jak Marakaiba (štat Sulija), Valensija (štat Karaboba), Irybaren (štat Łara), San Krystabal (štat Tačyra) i Barynas (štat Barynas). Heta aznačaje, što apazicyja dasiahnuła pośpiechu, jaki maje značny simvaličny charaktar.

Mała taho, što apazicyjaniery pieramahli ŭ dvuch «perlinach» krainy: Karakasie — palityčnaj stalicy Vieniesueły, i Marakaiba — stalicy naftazdabyčy. Jany jašče j adabrali ŭ čavistych Barynas — radzimu nie kaho inšaha jak samoha Čaviesa, horad, u jakim čaviesaŭski kłan mieŭ doŭhuju historyju pieramohaŭ.

Takim čynam, vybary prademanstravali, što Madura, jaki «na tonieńkaha» prajšoŭ paŭhoda tamu na pasadu prezidentu, na fonie žudasnaje inflacyi, rostu kryminału, razhromu biźniesu i razmovaŭ ź niabožčykami, zdoleŭ zachavać padtrymku z boku, prynamsi, traciny nasielnictva.

Jak cytuje sajt news.yahoo.com dyrektara sacyjalahičnaha ahienctva Datanálisis Luisa Visente Leona, «zdaryŭsia varjacki paradoks: adziny, chto pieramoh u vyniku kryzisu, – heta Madura». Pry hetym robiacca prahnozy, što ciapier u Madury źjavilisia dobryja šancy dasiadzieć da kanca svajho prezidenckaha terminu (2018 h.).

Adnača, jak adznačajuć inšyja kamientatary na forumach, byŭ by dziŭnym inšy varyjant pry ŭmovach amal tatalnaha kantrolu dziaržavy nad ŚMI. Niekatoryja kažuć pra ŭpłyŭ na vyniki hałasavańnia prysutnaści vajskoŭcaŭ, byccam by «dla padtrymańnia paradku».

Što charakterna, nichto nie hańbić apazicyju i jaje lidaraŭ. Zatoje hučyć zaniepakojenaść, što Madura moža zabaranić apazicyjnyja partyi.

Hetaje mierkavańnie, sapraŭdy, padajecca słušnym. Bo, niahledziačy na peŭnuju pieramohu, čavistyja nie vyrašyli asnoŭnych prablemaŭ, u tym liku, prablemy resursaŭ.

Razhrom pryvatnaha biznesu (a jak jašče možna paznačyć «ekanamičnuju vajnu», pra jakuju kaža apošnim časam Madura?) jašče bolš pavialičvaje ciažar sacyjalnaj adkaznaści dziaržavy.

A dla vykanańnia sacyjalnych abaviazkaŭ patrebny resurs. Na fonie padzieńnia koštaŭ na naftu padobnaha resursu na haryzoncie nie bačycca.

«Hazprom», kaniečnie, vydzieliŭ krychu bolš za tydzień tamu kredyt u 1 millard dalaraŭ vieniesuelskaje naftazdabyvajučaje kampanii Petroleos de Venezuela SA (PdVSA ), a ŭ hetym miesiacy, kažuć, vydzielić jašče 1,2 młrd, što dazvolić PdVSA razpłacicca z daŭhami i, maŭlaŭ, udvaja pavialičyć abjomy naftazdabyčy.

Ale heta, vidavočna, časovaja miera: prablemaŭ sistemy mieniedžmientu, jakaja daviała dziaržaŭnuju naftazdabyvajučuju kampaniju ŭ daŭhavuju jamu, jana nie vyrašyć. Plus, iznoŭ ža, padzieńnie koštaŭ na naftu, jakoje budzie tolki padchlestvacca pavialičeńniem zdobyčy i rostam kankurencyi na suśvietnych rankach (pamiatajem pra słancavy haz, ZPH, źniaćcio sankcyj ź Irana i h.d.). Tak što, zastajecca pytańniem, nakolki chopić u «Hazproma» srodkaŭ ciahnuć jašče adnaho «brata».

Tamu dla Madura naturalnym padajecca vykarystańnie represiŭnych mietadaŭ dla padaŭleńnia niezadavolenaści, u tym liku, i zabarona ci abmiežavańnie dziejnaści apazicyjnych partyjaŭ.

Jak adznačyŭ lidar apazicyi Kapryles Radonski, nacyja jość raskołataj, i joj nieabchodny dyjałoh, kab jaho pieraadoleć. Ale, dadam, urad pakul nie vyhladaje nadta hatovym da razmovy.

Sapraŭdy, vybary 8 śniežnia pakazali, što padzieł vieniesuelcaŭ na dva prykładna roŭnyja łahiery zachavaŭsia.

Kali ŭrad abiare kanfrantacyjnuju madel, hetaje procistajańnie moža nabyć haračyja formy. Pryčym, inicyjatarami mohuć vystupić jak raz prapanienty ŭłady. Takija vypadki ŭžo zdaralisia za časam elekcyjnaj kampanii: adna nievialičkaja levaradykalnaja hrupoŭka abviaściła, što 20 listapada ździejśniła try vybuchi la štab-kvateraŭ apazicyjnych siłaŭ. (Što cikava, adnoj z padstavaŭ dla hetych akcyjaŭ było toje, što adzin z apazicyjnych lidaraŭ zahadaŭ źnieści pomnik Fidelu Kastra, dy jašče i «cynična paskokaŭ» na pavieržanym kumiry levakoŭ).

Tamu dla apazicyi, jak i dla Vieniesueły ŭ cełym, bližejšaja budučynia vyhladaje davoli sumna.

Jak napisaŭ adzin z udzielnikaŭ abmierkavańnia pracytavanaha vyšej artykuła z YAHOO!news: «Heta jašče nie čas apazicyi. Trahiedyja musić być adyhranaj da kanca».

• 0
• 0
• 0
• 0
• 0
• 0
• 0
• 0