Kaniešnie, prosta tak supała: Sidorski naviedaŭ Letuvu akurat pierad samitam SND u Dušanbe. Ale jahonyja pieramovy ź letuvisami mohuć zrabić uražańnie na rasiejskaje kiraŭnictva, miarkujuć asobnyja analityki. Zrešty, Pucin chiba što rasščodrycca na kredyt.
Sa svajho boku, letuviskija palityki dy biznesoŭcy tolki i čakajuć, kab kranuŭsia lod u stasunkach aficyjnaha Miensku z Eŭraźviazam. Vilnia, pamiatajecie, navat sprabavała adhavaryć Brusel ad namieru adabrać u našaj krainy handlovyja preferencyi.
Tut, u Biełarusi, našym paŭnočna-zachodnim susiedziam bačycca vialiki dy perspektyŭny absiah dziejnaści. Navat užo zaraz jany hatovy investavać da miljardu dalaraŭ. I pakrysie, biez zališniaha afišavańnia, ichni kapitał užo pratočvajecca ŭ našu ekanomiku. A kali źmiakčyć palityčny i dziełavy klimat?
Dadamo na vuška:) u letuvisaŭ jašče i hieapalityčnyja ambicyi, pretenzii na rolu rehijanalnaj dziaržavy. U Vilni miarkujuć, što zdolnyja jak minimum nia horaj za palakaŭ ci ŭkraincaŭ zhulać rolu pasiarednikaŭ va ŭciahvańni "apošniaj dyktatury" ŭ praces zbližeńnia z EZ.
Sa svajho boku, i biełaruskija ŭłady atrymlivajuć jak ekanamičny, tak i hieapalityčny vyjhryš. Naprykład, užo nie taki strašny enerhietyčny šantaž z boku Maskvy, kali jość varyjant (chaj sabie na siońnia bolej pijaraŭski) pryhnać tankiery ŭ Kłajpedu i adtul vazić "čornaje zołata" pa čyhuncy. Sidorski taksama prazrysta namiaknuŭ na hatovaść paŭdzielničać u susiedzkim atamnym prajekcie.
Darečy, ci pamiatajecie: letuviski prezydent Adamkus jašče hod tamu, natchniŭšysia presavaj kanferencyjaj Łukašenki dla ŭkrainskich žurnalistaŭ, prapanavaŭ traisty źviaz (Vilnia — Miensk — Kijeŭ) dziela supraćstajańnia enerhietyčnamu dyktatu z uschodu. Mo' akurat zaraz praces i pajšoŭ?
"Nielha vyklučać, što Miensk hatovy byŭ nakiravać Sidorskaha i na vilenski samit u pytańniach enerhabiaśpieki, što projdzie 10—11 kastryčnika, — skazaŭ mnie siońnia naš mižnarodny ahladalnik Raman Jakaŭleŭski. — Ale tut moh napałochać apošni hazpromaŭski vokryk na Kijeŭ. Varta źviarnuć uvahu i na toje, što, kažučy, pra Kłajpedzki port, Sidorski zhadaŭ i pra paŭdniovyja porty, to bok pra Ŭkrainu".
Na dumku kalehi, "siońnia Letuva faktyčna jość lakamatyvam rehijanalnaj intehracyi, u jakoj znachodzicca miesca i histaryčnaj susiedcy — Biełarusi. Heta realny vynik pracy letuviskaha MZS na čale z byłym ambasadaram u Miensku Piatrasam Vajtekunasam".
ZY. Nu a Pucina, kali ŭsurjoz, naŭrad ci nadta napałochaješ "enerhietyčnym VKŁ". Sastupak nia budzie. Adno što sapraŭdy mohuć damovicca narešcie pra kredyt. Dy mo' pra novaha sakratara SND. Pamiatajecie, uletku biełaruski kiraŭnik pakazaŭ charaktar i zabrakavaŭ Viešniakova? Ciapier pratačyłasia infa, što pasadu mohuć dać Hienadziu Sielaźniovu. Nia tak daŭno, darečy, jon zaziraŭ u Minsk.
