Siarod pretenzij u adras reform, jakija pravodzilisia ŭ Hruzii za časami Michaiła Saakašvili, najčaściej hučyć pavieličeńnie biespracoŭja u krainie. U krainie 16% nasielnictva nie majuć stałaj pracy, ale kali dadać tak zvanych «samaŭładkavanych», to atrymlivajecca bolš za 50% pracazdolnaha nasielnictva.
U Hruzii daŭno isnuje taki termin, jak «samaŭładkavanyja» — heta tyja ludzi, jakija aficyjna nie pracavali ciaham doŭhaha terminu, i zabiaśpiečvajuć siamju, naprykład, pry dapamozie ŭłasnaj haspadarki. Samaŭładkavanaść stała asnoŭnaj formaj pracoŭnaj dziejnaści ŭ Hruzii ź siaredziny 1990-ch. Kab vyžyć, ludziam davodziłasia zajmacca naturalnaj haspadarkaj, i da 2003-ha, času «revalucyi ružaŭ», samaŭładkavanymi byli 58,3% ekanamična aktyŭnaha nasielnictva.
Jašče ŭ 1992-m kiraŭnictva Hruzii praviało ziamielnuju reformu: prysiadzibnyja ziemli addavalisia va ŭłasnaje karystańnie biazvypłatna.
Hetaja pieršaja chvala reform była vielmi važnaj dla haspadarki krainy, bo faktyčna vyratavała hruzinaŭ ad hoładu.
Druhaja častka dziaržaŭnych ziemlaŭ addavałasia ŭ arendu. Ale, jak čaściakom zdarajecca, niadobrasumlennyja arandatary nie nadta imknulisia zachavać jakaść hleby, a chacieli atrymać usio adrazu i ničoha nie ŭkładać. Šmat chto z hetych ludziej byli znajomyja ź ministrami, i tamu mahli rabić što zaŭhodna na arandavanych ziemlach.
Ale takaja palityka zachoŭvałasia tolki da 2005-ha: paśla revalucyi ŭrad pryniaŭ zakon «Ab pryvatyzacyi ziamli, jakaja znachodzicca ŭ dziaržaŭnaj ułasnaści». Raniej hetyja ziemli nie byli pradstaŭlenyja na ziamielnym rynku, nie vykarystoŭvalisia ŭ jakaści zakładu dla atrymańnia kredytaŭ, nie byli srodkam pryciahnieńnia inviestycyj. Heta zapavolvała praces raźvićcia sielskaj haspadarki Hruzii i zaminała stvarać novyja pracoŭnyja miescy.
Ahrarnaja reforma pačałasia z aŭkcyjonaŭ, na jakich pradavalisia dziaržaŭnyja ziemli. Na ich mahli pretendavać tolki žychary navakolnych viosak. Ziamielnyja ŭčastki možna było kuplać u rasterminoŭku — maksimalny termin vypłaty poŭnaj sumy składaje 9 hadoŭ. Ale kali pakupnik pahasić doŭh raniej, jon atrymaje lhotnuju canu.
Hetaja reforma nie vyrašyła ŭsie prablemy sielskaj haspadarki Hruzii, ale palepšyła situacyju.
Samy viadomy prykład — heta situacyja z vyroščvańniem dy vytvorčaściu čaju.
Hruzija štohod zakuplaje 800-900 ton čaju dla ŭnutranaha spažyvańnia, choć u minułym stahodździ časami kraina zabiaśpiečvała patreby vielizarnaj savieckaj impieryi. Pa ŭsioj terytoryi byłoha SSSR byli raskidanyja čajnyja fabryki, jakija zajmalisia rasfasoŭkaj hruzinskaj harbaty.
Ekśpierty ličać, što rašeńnie prablemy lažyć na pavierchni: treba ŭ pieršuju čarhu zaniacca tradycyjnymi dla rehijona vidami haspadarki, raźvivać i padtrymlivać ich. «Nakarmić» krainu mohuć tolki takija tradycyjnyja haliny, jak žyviołahadoŭla, ptuškahadoŭla, pładavodstva, vyroščvańnie vinahradu dy harbaty. Ale akazałasia tak, što mienavita hetyja haliny, za vyklučeńniem, mabyć, ptuškahadoŭli, znachodziacca ŭ zaniapadzie.
Na dumku siabra partyi «Nacyjanalny Ruch» Zuraba Džaparydze, dziaržaŭnaja palityka pavinna zaachvočvać ludziej, spryjać raźvićciu novych technałohij, pavieličeńniu praduktyŭnaści i ŭradžajnaści chatnich haspadarak. «Jana pavinna stymulavać abjadnańnie drobnych haspadarak, stvareńnie i raźvićcio vytvorčych i zbytavych kaapieratyvaŭ. Hetyja abjadnańni mohuć palehčyć sumiesnyja zakupki sielskahaspadarčaj techniki, nasieńnia i inšych materyjałaŭ i prodaž hatovaj pradukcyi».
Da taho ž, Hruzija budzie mieć padtrymku z boku Jeŭrasajuza: biudžet atrymaje 4 miljony jeŭra ŭ ramkach prahramy Jeŭrapiejskaj palityki susiedstva dla sielskaj haspadarki i raźvićcia vioski. Miarkujecca, što heta paspryjaje likvidacyi biednaści ŭ rehijonach.
Paśla revalucyi ružaŭ u Hruzii sapraŭdy adbyŭsia pieryjad radykalnych reformaŭ, i ciapier, praz 10 hod, možna padvodzić vyniki.
Štości ŭ hruzinskaha naroda atrymałasia vydatna, štości — nie vielmi, ale ludzi nasamreč stali dumać pa-inšamu. Jak słušna zaŭvažyŭ u adnym sa svaich intervju Michaił Saakašvili, revalucyja tolki pačynajecca na vulicach sa ściahami, a praciahvajecca ŭ hałovach ludziej. Radykalnyja reformy (źmieny ŭ vizavym, transpartnym kantroli, źniščeńnie DAI) pryviali da taho, što ludzi pačali adčuvać siabie inakš — mahčyma, jany stali bolš sumlennymi. I nie tolki tamu, što pierastali davać chabar.
