 Karen Stewart |
Užo bolš za paŭhodu biełaruskaja apazycyja j eŭrapiejskija palityki aktyŭna sprabujuć schilić ułady Biełarusi raspačać hramadzki dyjaloh u krainie. Adnak urad Biełarusi ŭparta admaŭlajecca pravodzić pieramovy z Bruselem pry pasiarednictvie biełaruskaj apazycyi.
Temie dyjalohu biełaruskich uładaŭ z Eŭropaj była pryśviečanyja sustreča intelektuałaŭ i palitykaŭ u Krakavie, jakaja prajšła naprykancy minułaha tydnia. Kanferencyja adbyvałasia pry ŭdziele pradstaŭnikoŭ biełaruskaj apazycyi, polskich, niamieckich dy amerykanskich palitykaŭ. U spatkańni ŭziała ŭdzieł i ambasadarka ZŠA ŭ Miensku Karen Ściuart. Sp. Ambasadar pahadziłasia adkazać na niekalki pytańniaŭ našaj radyjostancyi. Ź joju razmaŭlaŭ Dźmitry Hurnievič.
Sp. Ambasadar, ci zaŭvažyli vy niejkija palityčnyja źmieny ŭ Biełarusi za apošnija paŭhodu. Mienavita ciaham hetaha času pytańnie pra dyjaloh stałasia klučavym punktam u adnosinach Eŭropy da Biełarusi.
K. Ściuart: U traŭni j krasaviku my bačyli pieršyja prajavy źmienaŭ, kali ŭłady vyzvalili troch palitźniavolenych pierad planavanym terminam. U hety ž čas byli dazvolenyja dźvie vialikija demanstracyi. Heta dało nam nadzieju, ale paśla ŭsio stała na raniejšaje miesca: ułady nie žadali vyzvalić bolš palitviaźniaŭ, naadvarot praciahvali aryštoŭvać apazycyjnych aktyvistaŭ. Tamu pazycyja ŭłady nie źmianiłasia. Kali kazać pra apazycyju, to ja aptymistka — jany supracoŭničajuć, raspracoŭvać ekanamičnuju platformu, blizkuju hramadztvu.
Na sustrečy ŭ Krakavie nie było pradstaŭnikoŭ aficyjnych uładaŭ. Na vašuju dumku, ci heta nie pamyłka — razmaŭlać pra dyjaloh biez adnaho z bakoŭ?
K. Ściuart: Vyniki takich kanferencyjaŭ raspaŭsiudžvajucca dziakujučy ŚMI. I ŭłady, i hramadztva daviedajucca, pra što my tut razmaŭlajem. A sieści razam my zmožam paśla taho, kali ŭbačym kankretnyja prykłady palityčnaj voli ŭładaŭ da praviadzieńnia demakratyčnych reformaŭ. Pierad tym, jak raspačać pieramovy, my pavinny ŭbačyć dziejańnie, a nia tolki słovy. Mienavita tamu my patrabujem vyzvalić palitviaźniaŭ. Tolki tady my zmožam raspačać dyjaloh.
Eŭropa prapanavała biełaruskim uładam 12 punktaŭ, realizacyja jakich značna dapamahła b Biełarusi j adnačasova palepšyła b stan hramadztva. Jak ZŠA mohuć paŭpłyvać na źmieny ŭ Biełarusi?
K. Ściuart: My budziem praciahvać rabić toje, što rabili da hetaha času. Ja maju na ŭvazie realizacyju prahramaŭ pa padtrymcy niezaležnych ŚMI, prahramy abmienu, budziem padtrymlivać niaŭradavyja arhanizacyi. A pieramieny ŭ Biełarusi pavinny rabić sami biełarusy, jany pavinny vybirać, jak ix radzima budzie raźvivacca. My budziem ich padtrymlivać, i rabić toje, što ŭ našaj mocy.
Fota photo.bymedia.net
