«Na kaleni! Ja takich, jak ty!..»: Adstaŭny pałkoŭnik milicyi zastreliŭ chłopca
Nie paśpieła ŭ Babrujsku ścichnuć žachlivaja historyja z zabojstvam 21-hadovaj Jani — jaje zabili cahlinaj, — jak novaja trahiedyja ŭskałychnuła horad. 24-hadovy Michaił sprabavaŭ zatrymać čałavieka ź pistaletam, ale zahinuŭ ad jaho.
Dva streły — u žyvot i hrudzi — ździejśniŭ adstaŭny milicyjant. Zabojstva zdaryłasia ŭ noč na 26 śniežnia.
«U 2:22 mnie patelefanavaŭ siabar. Pytajecca: u Mišu stralali, što rabić? Kažu, viazi ŭ balnicu, ja zaraz padjedu. A chvilin praź piać jon mnie patelefanavaŭ i skazaŭ, što Miša skanaŭ», — raskazvaje pryjaciel zabitaha Alaksandr.
«Ja ź Mišam raźvitaŭsia a pałovie na pieršuju nočy. Jon paprasiŭ mianie pryvieźci jaho na sustreču, a paśla zabrać, — praciahvaje jon. — Pa darozie zajechali na zapraŭku, vypili kavy. Miša prapanavaŭ tady jašče pakatacca. Ja byŭ stomleny i admoviŭsia, a za ctyrno sieŭ druhi siabar — u jaho byli pravy. Mianie advieźli dadomu, a sami pajechali».
Miša ź siabram tym časam viarnulisia na zapraŭku pa piva, ale ałkahol im nie pradali. Tady chłopcy i pajechali ŭ tuju babrujskuju kramu «XXI stahodździe», adkul adzin ź ich nie viarnuŭsia dadomu.
Kanflikt pačaŭsia praz toje, što Michaił chacieŭ schadzić pa małoj patrebie kala mašyny: bolš nie znajšoŭ kudy.
Heta nie spadabałasia adstaŭnomu milicyjantu, jaki na dobrym padpitku stajaŭ kala kramy.
«Miša skazaŭ, što schodzić u kramu, i paśla jany raźbiarucca. Vyjšaŭ, a dzieda ŭžo nie było. Paznajomiŭsia z chłopcami, što tam stajali. A zatym viarnuŭsia dzied, razmachvaŭ pistaletam: «Na kaleni! Ja takich, jak ty!..» Miša zachinuŭsia rukoj: «Supakojsia, navošta stralać — mirny čas…» A dzied prystrašyŭ: «Jašče krok — i strelu», — pierakazvaje Alaksandr.
Chłopcy pabiehli ŭ kramu vyklikać milicyju. Pa-telefanavaŭ na 102 i Michaił. Piensijanier, pačuŭšy pra milicyju, syšoŭ. Chłopcy ž vyrašyli nie adpuskać situacyju. Jany chacieli prasačyć za im, pakolki ŭžo vyklikali milicyju. Zajechali ŭ zavułak.
Miša z mašyny vyjšaŭ i paśliznuŭsia — pavaliŭsia ŭ bok dzieda. I tut prahučali dva streły…
«My znajomyja ź dziacinstva: i ŭ sadok chadzili razam, i ŭ škołu. Siabry paraźjazdžalisia ź vioski, a my tolki ŭdvuch zastalisia ŭ Kamiency. U Mišy byŭ taki rozum, što moh usim zajmacca. Apošnim časam jon pieraklučyŭsia na mašynu. U jaho byli «Žyhuli», jakija znutry całkam pierarabiŭ. Dachodziła da taho, što, kali siadaŭ niechta ŭ mašynu, nie moh pavieryć, što heta savieckaje aŭto», — zhadvaje Alaksandr.
Michaił skončyŭ univiersitet u Homieli i pa raźmierkavańni pryjšoŭ technołaham na Babrujski zavod traktarnych detalaŭ i ahrehataŭ.
Ale žyŭ u rodnaj Kamiency. Paśla Novaha hoda jaho pavinny byli pavysić — stavili načalnikam biuro.
«Viasielle čakałasia minułym letam… Jon chacieŭ kupić dom, usio jeździŭ i hladzieŭ. Ale nie padabraŭ, i viasielle adkłali», — dzielicca płanami siabar.
Zatrymany — 60-hadovy adstaŭny pałkoŭnik milicyi. Stralaŭ jon z zarehistravanaha pistaleta IŽ-70.
Hetaja madel źjaŭlajecca madyfikacyjaj pistaleta Makarava, stvoranaja ŭ 1990-ch jak spartyŭna-trenirovačny pistalet.
Zaviedzieny dźvie kryminalnyja spravy: za asabliva złosnaje chulihanstva i zabojstva. Najbolšaje pakarańnie — da 15 hadoŭ turmy.
Ciapier čytajuć
Siłaviki zatrymali lidara hurta «Pałac» Aleha Chamienku4
Kamientary