Deputaty Dziarždumy Rasii padrychtavali prajekt, zhodna ź jakim pajasny čas va ŭsich rehijonach Rasii budzie raz i nazaŭždy pieraviedzieny na adnu hadzinu nazad. Pry hetym siezonny pieravod strełak hadzińnikaŭ viernuty nie budzie, paviedamlaje Bi-Bi-Si.
Kali zakon budzie ŭchvaleny, čas u rasijskaj stalicy budučaj zimoj budzie adroźnivacca ad centralnajeŭrapiejskaha na dźvie hadziny, a nie na try, jak ciapier. U pieryjad, kali ŭ zachodnich krainach dziejničaje letni čas, roźnica pamiž centralnajeŭrapiejskim i maskoŭskim skarocicca da adnoj hadziny.
Staršynia kamiteta Dziarždumy pa achovie zdaroŭja Siarhiej Kałašnikaŭ skazaŭ u aŭtorak žurnalistam, što 20 studzienia jon z kalehami aficyjna ŭniasie ŭ Dziarždumu zakonaprajekt ab viartańni zimovaha času.
«Heta pytańnie ŭžo naśpieła. Paśla publikacyi pradstaŭlenych Rasspažyŭnahladam źviestkach vidavočna, što škoda zdaroŭju, jaki nanosić dziejučy ŭ RF čas, ničym nie abhruntavany».
Nahadajem, što kolki hadoŭ tamu Biełaruś śledam za Rasijaj pierastała pieravodzić strełki hadzińnikaŭ.
I ciapier roźnica ŭletku (a mienavita z kanca sakavika pa kaniec kastryčnika) z centralnajeŭrapiejskim časam pamiž Minskam ź Bierlinam, Varšavaj, Paryžam składaje adnu hadzinu, a ź Vilniaj — roźnicy ŭ časie niama.
A ŭzimku (z kanca kastryčnika pa kaniec sakavika) roźnica ŭ časie pamiž Minskam i Vilniaj składaje adnu hadzinu, a z Varšavaj, Paryžam i Bierlinam — dźvie hadziny.
Kali ž Rasija zakansiervuje zimovy čas, cikava, jak zreahuje Biełaruś, bo ciapier ceły hod roźnica ŭ časie z Maskvoj składaje adnu hadzinu.
Ci nie daviadziecca takim čynam uletku Minsku žyć całkam pa centralnajeŭrapiejskim časie, kab zastavałasia roźnica z Maskvoj u adnu hadzinu?