Proza novaha hoda: piać navinak, jakija źjavilisia ŭ kniharniach za apošnija tydni
Artur Klinaŭ «Škłatara»
Aŭtar ramanaŭ «Małaja padarožnaja knižyca pa horadzie Sonca» i «Šałom», mastak i piśmieńnik Klinaŭ pradstaviŭ čytačam novy raman «Škłatara». Jaho dziejańnie adbyvajecca ŭ kancy 2010. Adzin ź interjeraŭ — budynak na staličnym praśpiekcie Niezaležnaści 37a. Ciapier tam mieścicca halereja «Ŭ» i kniharnia «Łohvinaŭ», a raniej znachodziŭsia punkt pryjomu škłatary — adsiul i nazva. Hieroi knihi — litaraturna-mastackaja bahiema.
Hałoŭny hieroj traplaje na Płošču 19 śniežnia 2010. Śpiarša stavicca da padziej jak da karnavału, roli ŭ jakim raśpisanyja. Staŭleńnie źmianiajecca, kali na Płošču traplajuć jaho blizkija ludzi…
Viktar Šnip «Sabačyja historyi»
Hałoŭny redaktar vydaviectva «Mastackaja litaratura» Viktar Šnip najbolš viadomy jak paet. Aŭtar amal dvuch dziasiatkaŭ zbornikaŭ. Asobnuju staronku bijahrafii Šnipa zajmajuć «Sabačyja historyi», jakija jon drukavaŭ u «NN» u 1996—2002 i 2006 hadach. Historyi apublikavanyja ŭ toj paśladoŭnaści i redakcyi, jak byli ŭ štotydnioviku. U ścisłych apoviedach, u jakich dziejničajuć dva hieroi (Sabaka i Hraždan), u žartaŭlivaj ci sarkastyčnaj formie abyhryvajecca niejki epizod abo situacyja.
Uładzisłaŭ Achromienka «Muzy i śvińni»
Zhodna sa staražytnahrečaskaj mifałohijaj, u boha Zieŭsa i tytanidy Mniemaziny byli dzieviać dačok — muz, zastupnic navuk i mastactvaŭ. U knihu Achromienka ŭklučyŭ 27 sarkastyčnych navieł, kožny siužet farmalna datyčyć adnoj ź dzieviaci muzaŭ.
Aŭtar kaža, što ŭsie historyi śpisanyja z žyćcia.
Uładzimir Niaklajeŭ «Znaki prypynku»
Paet i druhi pieramožca premii Hiedrojca Niaklajeŭ pisaŭ knihu amal dziesiacihodździe. U 2004 cykł «Znaki prypynku» pačaŭ drukavacca na staronkach «NN». Praź piać hadoŭ častka zapisaŭ vyjšła ŭ niaklajeŭskich «Vybranych tvorach». Układalnikam poŭnaha vydańnia staŭ žurnalist Siarhiej Šapran.
Vinceś Mudroŭ «Bahun»
«Nichto tak bliskuča nie bačyć asablivaści savieckaha mientalitetu, jak Mudroŭ», — ličyć pierakładčyk Lavon Barščeŭski. Svajo 60-hodździe połacki piśmieńnik adznačaje knihaj «Bahun». Nazvu knizie dało adnajmiennaje apaviadańnie, padziei ŭ jakim razhortvajucca ŭ Zachodniaj Biełarusi paśla 1939-ha. Mudroŭ naturalna pieradaje psichałohiju viaskoŭcaŭ i ź biaźlitasnaj praŭdaj adlustroŭvaje pieršyja kroki novaj ułady.
Ciapier čytajuć
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach4
Kamientary