Biełaruś cieraz kosku
Pucin addaŭ laŭry najlepšaha intehratara Nazarbajevu. A nam śvieciać rynkavyja ceny "ŭ siabroŭskim režymie". Piša ŭ svaim błohu Alaksandar Kłaskoŭski.
Uklučyŭ televizar: idzie naŭprostavaja linija z Pucinym. Pieršaje ŭražańnie: što b ni havaryli pra jahonuju feesbešnaść, adkat ad demakratyi i h.d., ale ŭžo sam pa sabie peŭny intelektualny ŭzrovień, umieńnie trymać siabie pierad aŭdytoryjaj šmat što značać dla dziaržaŭnaha lidera. U hetym sensie Rasiei pašancavała.
A ciapier pa sutnaści: nakolki "Pucin dumaje pra Biełaruś"?
Na momant, kali nabirajucca hetyja radki, naša kraina dvojčy zhadanaja cieraz kosku. Adnojčy — kali zajšła havorka pra stasunki z novym uradam u Kijevie. Prahučała dziažurnaja fraza: maŭlaŭ, dačynieńni z susiednimi dziaržavami, asabliva Ŭkrainaj i Biełaruśsiu, jość hałoŭnym pryjatytetam (cikava, a ci byvajuć nie hałoŭnyja, druharadnyja pryjarytety?:)
Bolej kankretna vyhladaje teza, što ŭ pytańni enerhanośbitaŭ Rasieja maje namier pierachodzić na rynkavyja stasunki z Ukrainaj "miakka, spakojna, u siabroŭskim režymie". Tuju ž stratehiju možna sprajektavać i na Biełaruś. Učorašni prahnoz ambasadara Surykava (prykładna 125 dalaraŭ za tysiaču kuboŭ hazu naleta) daje padstavu mierkavać, što Maskva vyrašyła ŭzdymać ceny adnosna łahodna.
Zrešty... Pa-pieršaje, jašče nia viečar, a pa-druhoje, biełaruski bok, sami viedajecie, zdolny abvastryć hulniu ŭ luby momant. Tak što pry ŭsim nastroi Kramla na padvyšeńnie cenaŭ "u siabroŭskim režymie" biez ekstrymu na pieramovach moža i nie abyścisia.
Nu a druhi raz Biełaruś była zhadanaja cieraz kosku, kali Pucin havaryŭ pra kanstrujavańnie čarhovaha postsavieckaha mytnaha źviazu. Kamplimenty ž całkam sarvaŭ Kazachstan — Pucin nazvaŭ prezydenta i kiraŭnictva hetaj krainy liderami intehracyi na postsavieckim absiahu.
Pamiatajecie, byŭ čas, kali Łukašenka i Nazarbajeŭ vostra supierničali za hetyja laŭry? Ciapier vidavočna: pryz jedzie ŭ Astanu.
Mo' j dziakuj bohu? :)
Kamientary