Statkievič zaklikaŭ jeŭrapiejcaŭ stvaryć i ŭzbroić Biełaruski dobraachvotnicki korpus

U praciah niadaŭna apublikavanaha artykuła «Apakalipsis zaŭtra. Zona śmierci na bałkonie», u jakim Mikałaj Statkievič pieraściaroh nakont mahčymaha napadu Rasii na krainy Bałtyi ź Biełarusi i pahrozy prymianieńnia Maskvoj jadziernaj zbroi ź biełaruskaj terytoryi, niadaŭna vyzvaleny palitviazień u svaim telehram-kanale prapanavaŭ płan niejtralizacyi hetaj pahrozy.

Statkievič prapanuje sfarmiravać na terytoryi Polščy ź liku biełarusaŭ-emihrantaŭ Biełaruski miratvorčy dobraachvotnicki korpus. «My zaklikajem jeŭrapiejskija krainy zabiaśpiečyć Korpus finansava, a taksama bajavym ryštunkam, uzbrajeńniem i vajskovaj (u tym liku ciažkaj) technikaj».

Jon taksama prapanuje «raźmiaścić Korpus kala biełaruska-ŭkrainskaj miažy, dzie jaho zadačaj budzie niedapuščeńnie paŭtornaj ahresii suprać Ukrainy ź biełaruskaj terytoryi».

«Taksama zadačaj Korpusa budzie procidziejańnie sprobam rasijskaj ahresii suprać krain Bałtyi z terytoryi Biełarusi. Apynuŭšysia pierad pahrozaj udaru ŭ tył hrupoŭki ŭvarvańnia i z paŭstałaj krainaj za śpinaj, rasijskija militarysty buduć vymušany admovicca ad ahresii», — spadziajecca Statkievič.

«Taksama zadačaj Korpusa budzie siłavoje prymušeńnie Maskvy da vyvadu svajoj jadziernaj zbroi z terytoryi Biełarusi», — miarkuje jon.

Na siońnia biełarusy zmahajucca suprać rasijskaha impieryjalizmu ŭ składzie Uzbrojenych siłaŭ Ukrainy. Prynamsi 79 biełarusaŭ zahinuli, baroniačy niezaležnaść Ukrainy. Siarod znakavych postaciaŭ taho zmahańnia — čempijon-viaślar Pavieł Šurmiej, jaki ŭznačalvaŭ Połk Kalinoŭskaha, maładafrontaviec Dzianis «Vaŭkałak» Urbanovič, jaki byŭ 5 razoŭ paranieny i 33 razy kantužany. Siarod tych, chto zahinuŭ, — Mirasłaŭ «Myš» Łazoŭski, a taksama Alaksiej Tur, jaki zahinuŭ, baroniačy Kijeŭ u 2022 hodzie. Adzinym ź biełarusaŭ-dobraachvotnikaŭ jon byŭ paśmiarotna ŭdastojeny zvańnia Hieroj Ukrainy.

Adnak ahulnaja kolkaść biełarusaŭ, jakija dobraachvotna ŭstupili va ŭkrainskuju armiju niedastatkovaja, kab skłaści ceły korpus. Dakładnaja ličba biełaruskich dobraachvotnikaŭ nieviadomaja, ale imavierna za ŭvieś čas vajny praz USU prajšło mienš za tysiaču biełarusaŭ. Ciapier asobnaj biełaruskaj struktury ŭ USU nie zastałosia, biełarusy raźmierkavanyja va ŭłasnaŭkrainskija adzinki.

Pakidajučy pasadu, eks-kamandzir Pałka Kalinoŭskaha Pavieł Šurmiej zajaviŭ, što padraździaleńnie ŭžo nie źjaŭlajecca pałkom pa kolkaści.

Siłavyja i patryjatyčnyja inicyjatyvy ŭ Polščy i Litvie typu «Paspalitaha rušeńnia» taksama abjadnoŭvali dziasiatki, a nie sotni čałaviek.

Ciažka skazać, ci ŭ vypadku stvareńnia biełaruskaha miratvorčaha farmiravańnia ź pierśpiektyvami finansavańnia heta pryvabiła b novych achvotnikaŭ.

Pieršym anałahičnuju ideju prapanoŭvaŭ pradstaŭnik Abjadnanaha pierachodnaha kabinieta pa pytańniach abarony Vadzim Kabančuk. Jon pryvodziŭ u prykład nacyjanalnyja złučeńni Svabodnaj Francyi i Polskaha ŭrada ŭ vyhnańni časoŭ minułaj vajny. Na dumku Vadzima Kabančuka, novyja farmavańni mahli b ulicca ŭ polska-ŭkrainska-litoŭskuju bryhadu imia Kanstancina Astrožskaha. Kabančuk kaža, što achvotnych — mnohija sotni.

• 25
• 1
• 7
• 2
• 0
• 1
• 0
• 1