Siońnia daviałosia być śviedkam, jak były hedeeraŭski pravaabaronca pračytaŭ maleńkuju lekcyju biełaruskamu ministru zamiežnych spraŭ:) Piša ŭ svaim błohu Alaksandar Kłaskoŭski.
Siońnia daviałosia być śviedkam, jak były hedeeraŭski pravaabaronca pračytaŭ maleńkuju lekcyju biełaruskamu ministru zamiežnych spraŭ:) Maju na ŭvazie dysput u Minskim mižnarodnym adukacyjnym centry.
Sp. Martynaŭ byŭ, kaniešnie, nie adzinym słuchačom. U zale siadzieli, naprykład, i tyja, chto adsiedzieŭ nasamreč. Za palityku. Mikoła Statkievič, Michaił Marynič, Siarhiej Skrabiec…
Niešta ŭsio ž zrušvajecca. Aficyjny Miensk sprabuje prademanstravać pierad Eŭropaj vučnioŭskuju pozu. Siońnia naš ministar (darečy, sam fakt jaho asabistaha pryjezdu na dysput užo jość pakazčykam) davodziŭ, što Biełaruś znachodzicca ŭ pracesie transfarmacyi i nadta cikavicca adpaviednym dośviedam ziamli Brandenburh, kolišniaj častki sacyjalistyčnaj Uschodniaj Niamieččyny. Dyjaloh bolej efektyŭny, čym sankcyi, prazrysta namiakaŭ Martynaŭ.
Sa svajho boku, były hedeeraŭski pravaabaronca i ciapierašni premjer Brandenburhu sp. Płacek — hałoŭny hość siońniašniaha mierapryjemstva — karektna, ale vyrazna nahadaŭ pra 12 umoŭ Eŭraźviazu. Padkreslliŭ, što asabista jon nikoli nie pahodzicca zapluščyć vočy na parušeńni pravoŭ čałavieka. Parazvažaŭ pra svabodu presy, schodaŭ, pra talerantnaść…
Biełaruskija čynoŭniki pakorliva słuchali.
Zhadałasia, jak mieniej za hod tamu tahačasny śpikier Kanaploŭ u hetych samych ścienach davaŭ pračuchancu niamieckamu palityku Pofału, jakoha nazvaŭ "čornym jastrabam". I ŭvohule vydaŭ ceły kaskad ekspresiŭnych tyradaŭ u duchu klasyčnaj antyzachodniaj prapahandy.
Siońnia — ni Kanaplova, ni zakidaŭ u bok "hniłoha Zachadu".
Pryjezd Płaceka — sam pa sabie syhnał. Heta vam nia eŭrabiurakrat siaredniaj ruki, a zaŭvažnaja palityčnaja fihura. Zaŭtra premjer Brandenburhu sustrakajecca ź Sidorskim. Tut pilnyja vykryvalniki prajavaŭ niamieckaj Realpolitik na biełaruskim kirunku mohuć strapianucca: što, huli z dyktaturaj? Admysłova dla ich:) Płacek daŭ voś hetaje maleńkaje interviju BiełaPAN. Vyhladaje na toje, što jon razumieje: zmušanaja vučnioŭskaja poza biełaruskich uładaŭ jašče nia jość padstavaj dla eŭfaryi. Urok moža vylecieć cieraź inšaje vucha, a ŭ školnym rancy pa-raniejšamu lažyć vialikaja rahatka.
Ciapier čytajuć
Zahinuŭ biełaruski dobraachvotnik Vasil «Dzir» Rapicki10
Kamientary