Siłavyja struktury biaździejničajuć na ŭschodzie Ukrainy. «Nie paddavacca na pravakacyi» — taki zahad z Kijeva. Pytańnie, ci heta idzie ad niežadańnia spravakavać uvarvańnie Rasii, ci ad niazdolnaści zmusić siłavikoŭ Uschodniaj Ukrainy da dziejańniaŭ.
Paradaksalna, ale dziejničać pieršymi pačali biznesoŭcy i deputaty.
Tak, miljarder Taruta ŭznačaliŭ Danieckuju vobłaść, a miljarder Kałamojski — Dnieprapiatroŭskuju. I mabilizavali na zmahańnie ź sieparatystami svaje kłany i achoŭnyja struktury.
A na hetym videa — deputat ad paŭnočnaŭkrainskaha horada Čarnihaŭ i ŭradženiec Łuhanščyny Aleh Laško z hrupaj siłavikoŭ aryštoŭvaje pravadyra łuhanskich sieparatystaŭ.
Lidar tak zvanaj «Maładoj hvardyi» i pradstaŭnik Viktara Miedviedčuka ŭ Łuhanskaj vobłaści — 45-hadovy Arsien Klinčajeŭ. Laško, lidar mikraskapičnaj Radykalnaj partyi, apublikavaŭ videasiužet pra zatrymańnie na staroncy Internet-TV «Hołas naroda» i ŭ siabie ŭ Fejsbuku.
Na kadrach vidać, jak hrupa nieviadomych na čale ź Laško kładzie Klinčajeva na padłohu, nadziavaje kajdanki. Paśla hetaha zatrymany na kamieru zaklikaje paplečnikaŭ vyzvalić abłasnuju administracyju, źniać rasijski ściah i viarnuć na miesca dziaržaŭny.
«Učora ja inkohnita prybyŭ na svaju rodnuju Łuhanščynu, kab kiravać hetaj apieracyjaj, — piša Laško. — Padonak Klinčajeŭ budzie adkazvać za svaje złačynstvy — my zatrymali jaho i pieradali pravaachoŭnym orhanam».
Varta adznačyć, što łuhanskaja milicyja Klinčajeva adpuściła, a nad abłasnoj administracyjaj iznoŭ uźniaŭsia rasijski ściah.
Kamientary