Rasija abviaściła, čaho choča ad Ukrainy: Krym, fiederacyju, movu
MZS Rasii zaklikaje stvaryć mižnarodnuju hrupu «dapamohi Ukrainie», jakaja pavinna zrabić z Ukrainy pazabłokavuju fiederacyju biez Krymu ź dźviuma dziaržaŭnymi movami. Pra heta havorycca ŭ zajavie rasiejskaha MZS, dzie ahučany prapanovy RF.
Rasija ŭ čarhovy raz zapeŭniła, što jana nie datyčnaja da situacyi ŭ Ukrainie, jakaja «źjaŭlajecca vynikam hłybokaha kryzisu ŭkrainskaj dziaržavy, što pryvioŭ da palaryzacyi hramadstva i rezkich abvastreńniaŭ antahanizmu pamiž roznymi častkami krainy».
Dla pieraadoleńnia hetaha «ŭnutranaha kanfliktu» Rasija prapanuje stvaryć hrupu padtrymki dla Ukrainy.
Rasija prapanuje hetaj hrupie zaniacca vykanańniem damoŭlenaściaŭ 21 lutaha, a mienavita: zdačaj «niezakonnaj zbroi», vyzvaleńniem budynkaŭ i vulic, rasśledavańniem śmierciaŭ u Kijevie.
Taksama «biez pramarudžvańnia sklikać pa rašeńni Viarchoŭnaj Rady kanstytucyjny schod z roŭnym pradstaŭnictvam usich ukrainskich rehijonaŭ dla padrychtoŭki novaj fiederatyŭnaj kanstytucyi».
Hetaja kanstytucyja, pavodle mierkavańnia Rasii, pavinna zamacavać fiederatyŭny ład Ukrainy, jaje vajenna-palityčny niejtralitet, dziaržaŭny status ruskaj movy, abaronu pravoŭ čałavieka i ŭsich mienšaściaŭ, vybarnaść miascovaj ułady i nieŭmiašalnictva ŭ spravy carkvy.
MZS RF miarkuje, što takuju kanstytucyju varta zaćvierdzić na ŭsieŭkrainskim refierendumie.
Paśla hetaha Rasija choča ahulnych i miascovych vybaraŭ «orhanaŭ zakanadaŭčaj i vykanaŭčaj ułady ŭ kožnym subjekcie fiederacyi».
Asobna Rasija nastojvaje na tym, kab hrupa zajaviła, što «pryznajecca i pavažajecca prava Krymu vyznačyć svoj los pavodle vynikaŭ svabodnaha volevyjaŭleńnia jaho nasielnictva ŭ chodzie praviedzienaha 16 sakavika 2014 refierendumu».
Rasija znoŭ prapanuje, kab užo novuju terytaryjalnuju cełasnaść i suvierenitet Ukrainy harantavali: Rasija, ES i ZŠA praz rezalucyju SB AAN.
Delehatka KR Karpušonak paśla maŭčańnia apublikavała videa31
Delehatka KR Karpušonak paśla maŭčańnia apublikavała videa
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach1616
Kamientary