 Uha Čaves |
Kiraŭnictva hrodzienskaj filii ruchu «Za Svabodu» źviartajecca da prezidenta Vieniesueły Uha Čaviesa z zaklikam być aściarožnym, prymajučy prapanovy biełaruskaha Ministerstva architektury i budaŭnictva pa restaŭracyi histaryčnaha centra stalicy Vieniesueły Karakasu.
Nahadajem, dniami dziaržaŭnaje infarmacyjnaje ahienctva BiełTA paviedamiła pra damoŭlenaść pamiž Vieniesuełaj i Biełaruśsiu pra ŭdzieł biełaruskich restaŭrataraŭ u adnaŭleńni histaryčnaha centra Karakasu. «Pytańni supracoŭnictva ŭ hetym napramku razhladalisia ŭ čas vizitu ŭ Vieniesuełu biełaruskaj delehacyi ź Ministerstva architektury i budaŭnictva. U Karakasie pradstaŭniki Biełarusi naviedali Instytut kulturnaj spadčyny pry Ministerstvie kultury Vieniesueły i paznajomilisia ź jaho dziejnaściu. U čas sustrečy z kiraŭnictvam hetaha instytuta razmova išła ab raźvićci samych važnych častak vieniesuelskaj stalicy. Dasiahnuta damoŭlenaść ab pradstaŭleńni ŭ śniežni prajekta restaŭracyi histaryčnaj častki Karakasu», — havorycca ŭ paviedamleńni BiełTA.
«Hrodzienski ruch «Za Svabodu» zaniepakojeny losam histaryčnaj častki Karakasu, hetaj žamčužyny Łacinskaj Amieryki. Zaniepakojeny tamu, što my, hrodziency, u svaim rodnym horadzie pabačyli vyniki hetak zvanaj rekanstrukcyi. Za apošnija hady «śpiecyjalisty» mietadyčna i cynična zrujnavali histaryčny centr staražytnaj Harodni, jakaja sa stratami pieražyła niekalki stahodździaŭ rasijskaj akupacyi, amal 50 hod Savieckaha Sajuzu, Pieršuju i Druhuju suśvietnyja vojny», — havorycca ŭ zajavie.
Kiraŭniki hrodzienskaha ruchu «Za Svabodu» nahadvajuć Uha Čaviesu, što niahledziačy na achviarnuju kampaniju pa ratavańni Hrodna ŭładam ŭsio ž udałosia zrujnavać častku histaryčnaj zabudovy horada. Akramia lista da prezidenta Vieniesueły, hrodziency maju namier nakiravać u meryju Karakasu zbor fota histaryčnaha centra Hrodna pierad i paśla hetak zvanaj rekanstrukcyi.
«My možam padzialicca z karakascami svaim dośviedam zmahańnia z vandałami ad biurakratyi. Karakas, nie paŭtary pamyłak Hrodna!», — zaklikaje hrodzienski ruch «Za Svabodu».
Kamientujučy Racyi hetuju inicyjatyvu, adzin z aktyvistaŭ kampanii pa ratavańni Hrodna Pavieł Mažejka zajaviŭ:
«My zaniepakojeny losam stalicy Vieniesueły. Mała taho, što ŭ 50‑ch hadach XX‑ha stahodździa dyktatar Pieras Chimienes amal źniščyŭ kałanijalnuju architekturu Karakasa, dyk zaraz spravu mohuć skončyć biełaruskija «admysłoŭcy». My raźličvajem na sumleńnie prezidenta Uha Čaviesa, na toje, što sapraŭdny patryjot svajoj krainy nie dapuścić źniščeńnia histaryčnych kaštoŭnaściej. Hetak biełaruskija śpiacy dabiarucca i da voziera Cicikaka ŭ susiednim Pieru!»
Akramia taho, kaža Pavieł Mažejka, jaho niepakojać nastupstvy ad rekanstrukcyi Karakasu dla biełaruskaha turyzmu:
«Pamiž Biełaruśsiu i Vieniesuełaj ustalavany bieźvizavy režym. Ale mnostva prostych biełarusaŭ mohuć tak i nie pabačać karakaskija cikavostki! Treba nie dapuścić mahčymaha rujnavańnia Karakasu!».
