Heta nie pieršy vypadak błakavańnia niezaležnych ŚMI ŭ internecie, ale adklučeńnie ad internetu sierviera sajta, raźmieščanaha ŭ Biełarusi, adbyłosia ŭpieršyniu.
Kali ŭ 2010 ci 2011 hadach DDoSili abo adklučali dostup ź Biełarusi da Gmail, Facebook, Vkontakte i h.d., to ciapier prosta dubova adklučyli adras raźmieščanaha ŭ Biełarusi sajta.
Jak pakazvaje traceroute, pieradača źviestak abryvałasia na na asbr3.net.belpak.by. Vierahodna, internet-resurs zabłakavali na šluzie biełaruskaha data-centra.
Tatalnaja błakada doŭžyłasia prykładna z 19.10 da 23.20.
U adroźnieńnie ad, skažam, «Chartyi-97», sajt «Našaj Nivy», jaho siervier, fizična raźmieščany ŭ Biełarusi. Dla nas heta pryncypova — my biełaruskaja hazieta. Heta taksama patrabavańnie zakanadaŭstva. Zhodna z ukazam №60, biełaruskija jurydyčnyja asoby abaviazany raźmiaščać svaje sajty tolki na terytoryi Biełarusi. Niekatoryja biełaruskija ŚMI dahetul hetaha nie ažyćciavili, ale adpaviedna ich sajty, ź jurydyčnaha punktu hledžańnia, nie majuć aficyjnaha charaktaru.
Ciažka skazać, našto było błakavać sajt NN.BY, što aznačaje takaja demanstracyja siły. Možna z peŭnaściu śćviardžać, što nijakich pravavych padstavaŭ dla hetaha nie było. Mahčyma — ale heta tolki hipoteza — što na paśpiachovym i davoli mocnym sajcie teścili novyja mietodyki.
Źviarnuła ŭvahu, što adnačasova z błakavańniem «Našaj Nivy» byŭ zabłakavany dostup da žyvoj videatranślacyi radyjo «Svaboda». A taksama byŭ uskładnieny abo niemahčymy dostup da sajta telekanała «Biełsat». U vypadku apošniaha, mabyć, mieła miesca ddos-ataka. I «Biełsat», i «Svaboda» — nie biełaruskija pa miescy raźmiaščeńnia srodki masavaj infarmacyi, tamu zabłakavać ich sajty ź Biełarusi było nielha.
Što abjadnoŭvaje ŭsie try hetyja staronki? Najpierš toje, što try hetyja pieradavyja ŭ techanałahičnym płanie resursy zdolnyja rabić žyvyja abo vielmi apieratyŭnyja videatranślacyi ź miesca padziej.
Kali mienavita heta stała pryčynaj błakavańnia, to heta, kaniečnie, čyjaści praha dasiahnuć niemahčymaha. U sučasnym śviecie videa ŭsio adno traplaje ŭ sieciva: sotni ludziej zdymajuć na telefony.
Vypadki błakavańnia prosta razburajuć (ci paćviardžajuć) imidž i inviestycyjny rejtynh Biełarusi. Realisty cudoŭna razumiejuć, što dziaržava nie moža być «vybaračna pravavoj», jak nielha być «troški ciažarnaj».
U časie błakavańnia Redakcyja pracavała praz sacyjalnyja sietki:
Ukantakcie — vk.com/nasa_niva
Fejsbuk — facebook.com/pages/Naša-Niva-pieršaja-biełar…
Tvitar — twitter.com/@nasa_niva
Tam vy možacie znajści samy poŭny anłajn-repartaž.
I, kali łaska, zafrendzicie hetyja adrasy, kab mieć dostup da NN u vypadku paŭtareńnia takoha błakavańnia.
My budziem rasśledavać incydent 25 sakavika i, spadziajomsia, što vinavatyja ŭ svoj čas paniasuć pakarańnie.
Kamientary