Uładalnik krymskatatarskaha telekanała ATR Lanur Iślamaŭ prapanavaŭ svaju kandydaturu na pasadu vice-premjera ŭ samaabvieščanym krymskim ŭradzie pa kvocie krymskich tataraŭ.
Pra heta jon zajaviŭ na druhoj pazačarhovaj siesii kurułtaja krymskatatarskaha naroda 6-ha sklikańnia 29 sakavika, pieradaje krymskaje adździaleńnie Radyjo Svaboda.
Iślamaŭ paviedamiŭ, što źjaŭlajecca hramadzianinam Rasii, ale na dadzieny momant adčuvaje pryhniot.
«Ja patryjot krymskatatarskaha naroda, ale ciapier nam treba abaranić ŭvieś krymskatatarski narod. I kali vy skažacie, kab ja byŭ vice-premjeram, ja budu abaraniać vašyja intaresy, kali nie — to nie stanu», — skazaŭ jon.
«U mianie niama palityčnych ambicyj — zadača vyžyć, zachavać vašyja pradpryjemstvy i abaranić krymskatatarski narod «, — skazaŭ jon.
Na kurułtai rašeńnie pa hetym pytańni na hałasavańnie tak i nie pastavili, ale jość vierahodnaść, što ŭ dalejšym moža pryniać Miedžlis.
Raniej samaabvieščanaja prarasijskaja krymskaja ŭłada vystupiła z prapanovaj dać pasady vice- śpikiera i vice-premjera dla krymskich tataraŭ.
Miedžlis, pa prahnozach ekśpiertaŭ, najbolš vierahodna, pahodzicca na častkovaje supracoŭnictva ź nielehitymnaj prarasijskaj uładaj.
Jak viadoma, niekalki dzion tamu ŭ Maskvie pačalisia pravierki ŭ kampanijach, jakija naležać Lanuru Iślamavu.
«U zamoŭlenych artykułach Iślamaŭvu faktyčna vyłučany ultymatum: abo ty spyniaješ niezaležnuju pracu ATR, abo siadzieš u turmu jak lider niejkaj radykalnaj isłamisckaj hrupoŭki»,— pisaŭ žurnalist Ajdier Muždabajeŭ na svajoj staroncy ŭ Facebook pra cisk.
29 sakavika ŭ Bachčysarai adbyłasia pazačarhovaja druhaja siesija kurułtaja krymskatatarskaha naroda 6-ha sklikańnia.
Pa vynikach abmierkavańnia Kurułtaj abviaściŭ ab pačatku palityčnych i pravavych pracedur dla stvareńnia (adnaŭleńnia) nacyjanalna-terytaryjalnaj aŭtanomii krymskatatarskaha naroda na jaho histaryčnaj terytoryi — u Krymie.
