 |
U Smalenskuju abłasnuju Dumu źviarnulisia pradstaŭniki Ŭpraŭleńnia ŭnutranych spravaŭ vobłaści z prośbaj udaskanalić zakanadaŭstva. Pravaachoŭnyja orhany Smalenščyny zaniepakojenyja rostam kolkaści pravaparušeńniaŭ, jakija robiać biełaruskija hramadzianie, u asnoŭnym žychary pamiežnaj Viciebščyny, i jakija potym uciakajuć ad adkaznaści z terytoryi Rasiei.
Pavodle infarmacyi Ŭpraŭleńnia ŭnutranych spravaŭ Smalenskaj vobłaści, z pačatku hodu ŭ rehijonie zarehistravana 25559 administracyjnych pravaparušeńniaŭ, jakija ŭčynili zamiežnyja hramadzianie. Ź ich 25103 učynili biełarusy, u asnoŭnym žychary pamiežnaj Viciebskaj vobłaści. Raspaviadaje žurnalist smalenskaj abłasnoj hazety «Rabočij puť» Dźmitryj Raičaŭ:
«Upraŭleńnie ŭnutranych spravaŭ vydzieliła ŭ asobnuju katehoryju mienavita biełarusaŭ i źviarnułasia ŭ abłasnuju Dumu. Heta aficyjny dakument, jaki byŭ uniesieny na razhlad Smalenskaj abłasnoj Dumy Ŭpraŭleńniem unutranych spraŭ. A abłasnaja Duma, u svaju čarhu, źvierniecca ŭ Dziaržaŭnuju Dumu, kab pamiž Rasiejaj i Biełaruśsiu była padpisana mižnarodnaja damova, jakoj praduhledžvałasia b raspaŭsiudzić adkaznaść za administracyjnyja pravaparušeńni, učynienyja ŭ Rasiei, i na terytoryju Biełarusi».
Najčaściej biełarusy parušajuć praviły darožnaha ruchu, praviły handlu (pradajuć charčovyja tavary «ź ziamli»), ździajśniajuć drobnaje chulihanstva, brydkasłoviać u hramadzkich miescach u niećviarozym stanie. Byvajuć i kradziažy, rabaŭnictva. U asnoŭnym parušalnikaŭ zakonu sudy štrafujuć, adnak tak zvanyja «hastralory» štrafy nia płaciać. Z prysudžanych amal 2,5 miljonaŭ rasiejskich rubloŭ spłacili tolki 514 tysiač, paviedamlaje smalenskaja hazeta «Rabočij puť». Prazrystaja miaža pamiž dziaržavami dazvalaje parušalnikam zakonu jeździć biez prablem. I kožny asudžany rasiejskim sudom biełaruski hramadzianin moža lohka zhubicca. Smalenskaja milicyja źviarnułasia ŭ abłasnuju Dumu z chadajnictvam udaskanalić zakanadaŭstva.
Supracoŭnik presavaj słužby Viciebskaha abłasnoha ŭpraŭleńnia ŭnutranych spraŭ Alaksandar Kaziučyc kaža:
«Pamiž Upraŭleńniami ŭnutranych spraŭ Smalenskaj vobłaści i Viciebskaj vobłaści, na miascovym uzroŭni takija damovy jość. Usio adno aštrafavanyja rana ci pozna zapłaciać hetyja štrafy. Smalenskija milicyjanty zapyt afarmlajuć na nas, na respubliku, i naša milicyja ich šukaje. Znajšła — prymusovyja zachady vypłaty štrafu».
Pavodle infarmacyi presavaj słužby Viciebskaha ŭpraŭleńnia ŭnutranych spraŭ, uzajemadziejańnie pamiž pamiežnymi pravaachoŭnymi vorhanami jdzie, kiraŭniki abiedźviuch abłaściej rehularna sustrakajucca i abmiarkoŭvajuć ahulnyja prablemy.
Adnak biełaruskija pravaachoŭnyja vorhany tryvožać advarotnyja vypadki, kali biełaruskija złačyncy chavajucca ad pravasudździa ŭ Rasiei. Tak, 15‑hadovaha zabojcu ź Loźnienskaha rajonu Viciebskaj vobłaści adšukali ŭ Smalensku.
