Santechniku i elektryku ŭ biełaruskich damach budzie ramantavać adzin chaŭs-majstar — śpiecyjalist kompleksnaha absłuhoŭvańnia.
Jak zajaviŭ namieśnik premjer-ministra Biełarusi Anatol Kalinin, da kanca 2014 hoda ŭ stalicy budzie naličvacca 1,8 tysiačy śpiecyjalistaŭ kompleksnaha absłuhoŭvańnia, abo chaus-majstroŭ. Adzin čałaviek budzie absłuhoŭvać da 500 kvater. Pra heta 16 krasavika piša «Hrodzienskaja praŭda».
Temu chaus-majstra pačali prapracoŭvać ŭ krainie jašče ŭ 2011 hodzie. A ŭ 2012 hodzie była navučanaja hrupa pieršaprachodcaŭ — 35 čałaviek. U 2013 hodzie ŭ Minsku na bazie troch ŽESaŭ pačaŭsia ekśpierymient. Žyłfond pačali absłuhoŭvać śpiecyjalisty na ŭsie ruki, adzin čałaviek vykonvaŭ pracu elektryka, ślesara, santechnika, malara, cieślara. Adpaviedna vyrasła i zarabotnaja płata takoha śpiecyjalista.
— Zhodna z rašeńniem kalehii Ministerstva žyllova -kamunalnaj haspadarki, da kanca hoda ŭ abłasnych centrach nie mienš za 50% žyllovaha fondu pavinna absłuhoŭvacca chaus-majstrami, — raspavioŭ načalnik adździeła žyllovaj haspadarki ŭpraŭleńnia ŽKH Hrodzienskaha abłvykankama Uładzimir Sidarčuk. — My pajšli jašče dalej, i na abłasnoj kalehii ŽKH vyrašyli, što nie mienš za 50 % žylla takimi śpiecyjalistami budzie absłuhoŭvacca nie tolki ŭ Hrodnie, ale i ŭ Lidzie, Słonimie, Vaŭkavysku, Navahrudku i Smarhoni. Na minułym tydni praviali naradu z dyrektarami žyllova-ekspłuatacyjnych słužbaŭ. Na dniach śpiecyjalisty abłasnoha navučalnaha centra ŽKH adpraviacca ŭ Minsk, kab na praktycy pahladzieć, jak heta pracuje ŭ ich.
Rychtavać śpiecyjalistaŭ šyrokaha profilu buduć na bazie abłasnoha navučalnaha centra ŽKH. Viadoma, navučacca buduć ludzi, u jakich užo jość vopyt raboty pa absłuhoŭvańni žylla. U centry jany asvojać dźvie-try sumiežnyja śpiecyjalnaści.
Płanujecca, što na Haradzienščynie chaus-majstry spačatku sumieściać pracu santechnikaŭ i elektrykaŭ, u pierśpiektyvie cieślaroŭ i malaroŭ. Zastajučysia pa-raniejšamu ŭ štacie ŽESaŭ, jany zojmucca techničnym absłuhoŭvańniem žylla i akazańniem pasłuh nasielnictvu. Buduć vyznačany damy, dzie realna ukaranić taki vid pasłuh nasielnictvu i dzie heta ekanamična vyhadna.
Jak piša hazieta, kamunalniki zapazyčyli vopyt Hiermanii, dzie instytut chaus-majstroŭ sychodzić karaniami jašče ŭ XV stahodździe, kali ŭ horadzie Baden-Viurtembierh ŭviali ŭboračny tydzień. Jašče tady byli pryniatyja admysłovyja pastanovy, jakija da hetaha času častkova rehulujuć pytańni uborki ahulnych pamiaškańniaŭ. U XX stahodździ staŭ ŭkaraniacca instytut chaus-majstra, što dasłoŭna pierakładajecca jak «majstar pa chacie».
U Niamieččynie chaŭs-majstar — heta pravaja ruka kiraŭnika i jaho najvažniejšy pamočnik. Jon pryznačajecca ŭłaśnikam chaty abo kirujučaj kampanijaj. U abaviazki chaus-majstra ŭvachodziać zabieśpiačeńnie paradku i čyścini ŭ žyłym domie i absłuhoŭvańnie inžynierna-techničnych sistem, a taksama zamiena lampačak, źniaćcie pakazańniaŭ ličylnikaŭ uliku spažyvańnia (elektryčnaść, vada, haz), zabieśpiačeńnie biaśpieki pražyvańnia.
Chaus-majstar taksama kantraluje vykanańnie rabot inšymi padradnymi arhanizacyjami. Akramia taho, jon ažyćciaŭlaje štotydniovy ahlad i kantrol ahulnaha stanu techničnaha abstalavańnia doma. Raz u hod chaŭs-majstar robić ahlad usich kvater.
