Zatrymańni, adličeńni, štrafy.
22 kastryčnika
Jubilej u turmie
Staršynia Škłoŭskaj supołki Partyi BNF Alaksandar Fiodaraŭ adznačyŭ 50‑hodździe ŭ Mahiloŭskim izalatary časovaha ŭtrymańnia. Nahadajem, što sp. Fiodarava zatrymali 14 červienia, abvinavaciŭšy ŭ parušeńni pracedury vypłaty zarobku. Jamu pahražaje da 6 hadoŭ niavoli z kanfiskacyjaj majomaści. U žniŭni prakuror Škłoŭskaha rajonu Ihar Śnitkoŭ nie zadavoliŭ chadajnictva advakata pra vyzvaleńnie škłoŭskaha palityka pad padpisku pra niavyjezd.
Vydatnikaŭ preč z universytetaŭ
Mienharsud pakinuŭ u sile rašeńnie sudu pieršaj instancyi, jaki pryznaŭ zakonnym adličeńnie z Akademii kiravańnia pry prezydentu Jurasia Alejnika. Nahadajem, aktyvista adličyli z 4 kursu nibyta za propuski zaniatkaŭ, niahledziačy na vydatnyja adznaki.
23 kastryčnika
Adličyli z universytetu
Studentku 2 kursu jurydyčnaha fakultetu Haradzienskaha dziaržuniversytetu Kaciarynu Byčak aznajomili z zahadam rektara ab jaje adličeńni z VNU «za parušeńnie praviłaŭ unutranaha rasparadku». K.Byčak u traŭni była zatrymanaja milicyjaj, kali razam ź inšymi maładymi ludźmi vyjšła na abaronu histaryčnych budynkaŭ Horadni ad razbureńnia.U nieaficyjnaj razmovie ŭ dekanacie dziaŭčynie paviedamili, što sapraŭdnaj pryčynaj adličeńnia źjaŭlajecca ŭdzieł u akcyjach pratestu.
24 kastryčnika
Kručkatvorcy
U Ministerstvie justycyi kažuć, što pry vyvučeńni paradku stvareńnia pravaabaronča‑aśvietnickaha hramadzkaha abjadnańnia «Ruch «Za Svabodu» vyjaŭlena, što «jaho ŭstanoŭčy schod byŭ praviedzieny ŭ lasnym masivie na terytoryi zakinutaha dziciačaha lahieru z parušeńniami Zakonu «Ab masavych mierapryjemstvach u Respublicy Biełarusi». Na hetaj padstavie i pryniataje rašeńnie ab admovie ŭ rehistracyi.
Klimavu pahoršała
Palitviazień Andrej Klimaŭ piša z kalonii, što jamu balić serca, jon prastyŭ. U pakoi niama čym dychać — z susiedziaŭ tolki dvoje nia palać. Klimavu nie chapaje infarmacyi z voli. Palitviazień prosić siabroŭ i nieabyjakavych ludziej dasyłać jamu listy. A. Klimava asudzili na zakrytym sudovym pasiedžańni na dva hady źniavoleńnia ŭ kalonii strohaha režymu za antyŭradavy artykuł u internecie.
Ustalavańnie «talerki» — «pieraplaniroŭka»
Dakument, jaki b rehulavaŭ ustalavańnie spadarožnikavych antenaŭ i kandycyjaneraŭ, musiŭ źjavicca jašče ŭ žniŭni, ale nia źjavicca ŭvohule. Saviet ministraŭ vyrašyŭ, što nieabchodnaści ŭ im niama, bo isnuje Pałažeńnie ab paradku pieraplaniroŭki žyłych pamiaškańniaŭ. Štrafy, abaznačanyja ŭ Pałažeńni, — ad 310 tys. da 1,5 młn rub.
Sprabavali razahnać dazvoleny pikiet
Milicejski specnaz sprabavaŭ pieraškodzić praviadzieńniu sankcyjavanaha na vulicy Arłoŭskaj u Miensku pikietu salidarnaści z Alaksandram Kazulinym. Pikiet dazvoleny mienskimi ŭładami. Da pikietoŭcaŭ padjechali dva milicejskija aŭtamabili z numarami O749 MN i 9041 VT‑7. Milicyjanty nie nazvalisia i zajavili, što pikiet nibyta nie dazvoleny i pasprabavali pieraškodzić akcyi. Suprać dačok Alaksandra Kazulina Volhi i Juli ludzi ŭ cyvilnym užyli siłu i zabrali partrety palitviaźnia.
25 kastryčnika
Karnaja psychijatryja
Maładafrontaŭca z Homielu Andreja Cianiutu paśla naviedvańnia miascovaha KDB advieźli ŭ psychijatryčny špital u Biarozkach, dzie aktyvist pravioŭ 7 hadzinaŭ. Pavodle Andreja, pytańni zadavali dva psychijatry i supracoŭnik KDB Dźmitry Siedlaroŭ. Naprykancy razmovy Siedlaroŭ paabiacaŭ dniami naviedać kvateru maładziona dy nahadaŭ Cianiutu pra zdareńnie ź viadomaj aktyvistkaj apazycyi Kryścinaj Šacikavaj, jakuju ŭviesnu źmiaścili ŭ psychijatryčnaj lakarni Mahilova.
27 kastryčnika
Nie puskali da Kalinoŭskaha
Milicyja dvojčy zatrymlivała aktyvistaŭ, što nakiroŭvalisia ŭ Śvisłač, kab ušanavać pamiać Viktara Kalinoŭskaha. Aŭtobus spyniali ŭ Dziaržynsku i Baranavičach. Ludziej trymali ŭ aŭtobusie, nie dazvalali vychodzić. Pradstaŭniki MUS zajavili, što im treba vyśvietlić asoby zatrymanych. Kala sta čałaviek zdoleli dajechać u Śvisłač z Horadni, Vaŭkavysku dy Mastoŭ. Jany pa tradycyi ŭskłali kvietki da mahiły Viktara Kalinoŭskaha na mohiłkach u Śvisłačy.
Kamientary