U Biełarusi raspracavany płan mierapryjemstvaŭ pa praviadzieńni čempijanatu śvietu pa chakiei 2014 hoda jak svabodnaha ad tytuniu, paviedamiłazahadčyca adździeła hramadskaha zdaroŭja Respublikanskaha centra hihijeny, epidemijałohii i hramadskaha zdaroŭja Volha Bartman.
«Płan mierapryjemstvaŭ pa praviadzieńni čempijanatu śvietu pa chakiei jak svabodnaha ad tytuniu raspracavany pa daručeńni ŭrada. Praduhledžana poŭnaja zabarona kureńnia va ŭsich ŭnutranych pamiaškańniach spartyŭnych kompleksaŭ «Minsk-Arena» i «Čyžoŭka-Arena» i na prylehłych da ich terytoryjach. Zabaroniena budzie kuryć u kafe, barach i restaranach, raźmieščanych pablizu hetych spartyŭnych zbudavańniaŭ, u haścinicach, dzie buduć pražyvać udzielniki i hości čempijanatu, i ŭ taksi», - skazała Volha Bartman.
Akramia taho, praduhledžana zabarona na rekłamu i prodaž tytuniovych vyrabaŭ u miescach praviadzieńnia matčaŭ čempijanatu, na terytoryjach fan-zon, a taksama ŭ kafe, barach, restaranach, haścinicach, raźmieščanych pablizu miesc praviadzieńnia chakiejnych batalij.
Ab tym, što zona źjaŭlajecca svabodnaj ad tytuniovaha dymu, žycharoŭ i haściej stalicy buduć papiaredžvać znaki ab zabaronie kureńnia, jakija ŭ chutkim časie źjaviacca kala ŭsich raniej pieraličanych abjektaŭ. A tym, chto ŭsio ž zachoča zakuryć u čystych zonach, znajści śpiecyjalna adviedzienaje dla hetaha miesca dapamohuć vałanciory, jakija buduć pracavać u Minsku ŭ čas suśvietnaha chakiejnaha pieršynstva. Darečy, vałancioraŭ navučać, jak pravilna rabić zaŭvahu kurcu. Kožny, chto zakuryć u nienaležnym miescy, budzie infarmavany ab tym, što na čas ČS pa chakiei šerah zon u biełaruskaj stalicy abviaścili svabodnymi ad tytuniu, a taksama atrymaje infarmacyju, dzie znachodzicca bližejšaje adviedzienaje dla kureńnia miesca.
Jak adznačyła Volha Bartman, u tym, kab Minsk staŭ svabodnym ad dymu na čas praviadzieńnia spabornictvaŭ, zacikaŭleny mnohija ministerstvy i viedamstvy, Minharvykankam, administracyi ladovych aren, dyrekcyi Fiederacyi chakieja Biełarusi, haścinic, kafe, baraŭ i restaranaŭ.
Damoŭlenaść ab praviadzieńni čempijanatu śvietu pa chakiei jak svabodnaha ad tytuniovaha dymu była dasiahnuta ŭ čas sustrečy premjer-ministra Biełarusi Michaiła Miaśnikoviča z dyrektaram Jeŭrapiejskaha rehijanalnaha biuro Suśvietnaj arhanizacyi achovy zdaroŭja (SAAZ) Žužannaj Jakab.
Ciapier spartyŭnyja mierapryjemstvy suśvietnaha maštabu pakazvajuć prykład u baraćbie suprać spažyvańnia tytuniu, pakolki ŭ takich padziej jość patencyjał dla papularyzacyi zdarovaha ładu žyćcia i ŭpłyvu na sacyjalnyja normy dziakujučy pryciahnieńniu miljonaŭ hledačoŭ i balelščykaŭ.
