Rasijskija šturmaviki zachapili abłasny centr Łuhansk, farmirujuć armiju
Pad ich kantrolem akazalisia milicyja, prakuratura, telebačańnie, ukrainskich patryjotaŭ vykradajuć.
Jak i ŭ Krymie ŭ kancy lutaha i sakaviku, milicyja biaździejničaje. Viernyja Ukrainy častki SBU, pamiežniki i Unutranyja vojski abo nie mohuć, abo nie majuć zahadu ŭžyć siłu suprać sieparatystaŭ.
U adroźnieńnie ad Kryma, u Danbasie Rasija sutyknułasia z macniejšym supracivam z boku miascovych ukraincaŭ. Kali ŭ Krymie Rasija ŭziała pad svoj kantrol klučavyja abjekty infrastruktury za try dni, 26—28 lutaha, to ŭ Danbasie hety etap raściahnuŭsia na miesiac.
Ale scenar toj samy, i mietady tyja ž.
Dziejničaje miascovaja «piataja kałona». Jaje padtrymlivaje były «Bierkut». Šturmaviki z Rasii vykonvajuć rolu katalizatara, kab miascovyja nie bajalisia.
Rasija trymaje vojski na miažy i pahražaje masavym uvarvańniem u vypadku ŭžyćcia siły suprać sieparatystaŭ. U vyniku abvieščanaja Kijevam «antyterarystyčnaja apieracyja» źviałasia na ništo.
Zachoplivajucca dziaržaŭnyja ŭstanovy i abjekty infrastruktury. Suprać patryjotaŭ Ukrainy razhortvajecca teror. Biarucca pad kantrol srodki masavaj infarmacyi. I ŭ takoj atmaśfiery pryznačajecca «refierendum». Niama navat cieniu zakonnaści. Plebiscyt, da jakoha ŭ demakratyčnych umovach pavinny rychtavacca dva miesiacy, adbyvajecca pa zakonach vajennaha času i za tydzień.
U Danbasie taki płanujecca pravieści 11 maja. Śpiašajucca, kab paśpieć da prezidenckich vybaraŭ 25 maja.
Ukrainskaja administracyja demaralizavanaja i paralizavanaja. U Danieckaj vobłaści vykradzieny ŭkrainiec, člen vybarčaj kamisii.
U Łuhansku ŭ niadzielu šturmaviki zachapili budynki administracyj i siłavych struktur. Milicyja nie akazała supracivu.
Zakładniki z ABSIE praciahvajuć znachodzicca ŭ rukach sieparatystaŭ. Zachad praciahvaje kałoć miadźviedzia špilkaj piersanalnych sankcyj — Jeŭrasajuz u niadzielu zajaviŭ ab pašyreńni sankcyjnaha śpisu na 15 proźviščaŭ.
Kijeŭ praciahvaje rabić hučnyja zajavy, ale biez rašučych krokaŭ.
Śpikier Viarchoŭnaj Rady, v.a. prezidenta Ukrainy Alaksandr Turčynaŭ zajaviŭ, što padziei na ŭschodzie krainy pakazali «biaździejnaść, biezdapamožnaść, a časam i złačynnuju zdradu rabotnikaŭ pravaachoŭnych struktur u Danieckaj i Łuhanskaj abłaściach».
«Heta adna z hałoŭnych pryčyn nizkaj efiektyŭnaści i małavynikovych dziejańniaŭ ŭkrainskich siłavych struktur pa baraćbie z teraryzmam. Heta ciažka pryznavać, ale heta sapraŭdy tak. Pieravažnaja bolšaść siłavikoŭ na ŭschodzie nie zdolnaja vykonvać svaje abaviazki pa abaronie našych hramadzian», — havorycca ŭ zvarocie A.Turčynava da ŭkrainskaha naroda, apublikavanym na sajcie Viarchoŭnaj Rady ŭ aŭtorak.
Śpikier parłamienta adznačyŭ, što ŭ Daniecku i Łuhansku ŭžo pryznačanyja novyja kiraŭniki SBU. Praviedziena poŭnaja zamiena kiraŭnictva śpiecpadraździaleńnia « Alfa».
«Tyja padraździaleńni, jakija biez supracivu zdali svaje ŭpraŭleńni terarystam, nie mohuć abaranić žyćcio i biaśpieku ludziej i pryniać dziejsnyja miery, kab spynić terarystyčnuju pahrozu, pavinny być całkam abnoŭleny», — padkreśliŭ A.Turčynaŭ.
Kab sfarmavać abnoŭleny i dziejsny skład padraździaleńniaŭ MUS i SBU, v.a. prezidenta Ukrainy adznačaje, što ŭładzie «patrebnaja dapamoha ŭkrainskich patryjotaŭ, asabliva tych, chto pražyvaje na ŭschodzie Ukrainy. U pieršuju čarhu, heta tyčycca Danieckaj i Łuhanskaj abłaściej».
«Ja taksama patrabuju ad ministra ŭnutranych spraŭ zvolnić kiraŭnikoŭ abłasnych upraŭleńniaŭ unutranych spraŭ Łuhanskaj i Danieckaj abłaściej. Buduć zvolnienyja ŭsie pradstaŭniki siłavych struktur na miescach, jakija nie zdolnyja vykonvać svaje prafiesijnyja abaviazki. Tyja tak zvanyja «pravaachoŭniki», jakija zdradzili Ukrainie i pačali supracoŭničać z terarystami, buduć adkazvać pierad zakonam», — abiacaje A.Turčynaŭ.
Pryciahnuć da adkaznaści možna tolki tam, dzie centralnaja ŭłada kantraluje i zdolnaja pakarać. Kali milicyja Łuhanska i Daniecka nastroiłasia na pierachod pad rasijskija štandary, to źmianić situacyju moža tolki vajennaja apieracyja. Na jakuju Rasija adkaža jašče bolšym umiašańniem.
Pucin u Minsku 29 krasavika trymaŭsia samaŭpeŭniena i praciahvaŭ spakušać Zachad mahčymaściu ŭrehulavańnia situacyi na ŭmovach Maskvy.
Zdajecca, što ŭ płanach Maskvy — vyjhrać čas, kab stvaryć i ŭkamplektavać nibyta samastojnuju «armiju Danieckaj narodnaj respubliki». Z tym kab heta jana, a nie rasijskija vojski zachapili ŭsiu Navarosiju, a mahčyma, i Kijeŭ. Hramadzianskaja vajna va Ukrainie dazvolić Kramlu ŭmiešvacca va ŭnutranyja spravy susiedniaj krainy.
Kamientary