Pasły krain Eŭrasajuzu, Izrailu i ZŠA ŭskłali kvietki ŭ Kurapatach

U Dzień paminańnia prodkaŭ kiraŭniki dypłamatyčnych misij krain Jeŭrasajuza, Izraila i ZŠA, ich siemji i inšyja členy dypłamatyčnaha korpusa naviedali ŭročyšča Kurapaty, raźmieščanaje na paŭnočna‑ŭschodniaj uskrainie Minska.

Kala Kryža pakutaŭ, dzie dypłamataŭ sustreli pradstaŭniki hramadskaha arhkamiteta pa ŭviekaviečańni pamiaci achviaraŭ stalinizmu i studenty biełaruskich VNU, adbyŭsia malebien u pamiać biaźvinna zabitych ludziej,iakija zahinuli va ŭročyščy ŭ 1937—1941 hadach. Malebien praviali pravasłaŭny śviatar Minskaha Śviata‑Duchavaha kafiedralnaha sabora ajciec Alaksandr Šymbaloŭ i rymska‑katalicki ksiondz‑nataryus Minska‑Mahiloŭskaj archidyjacezii Juryj Sańko. Zatym udzielniki malebna vykanali duchoŭny himn «Mahutny Boža», a dypłamaty ŭskłali kvietki da Kryža pakutaŭ i zapalili śviečki.

Hetaja cyrymonija paŭtaryłasia kala pamiatnych znakaŭ palakam, jaŭrejam, łaŭki Klintana i miemaryjalnaha kamieniu sa słovami «Achviaram stalinizmu», raźmieščanaha ŭ samym vysokim punkcie ŭročyšča.

Na miescy pachavańnia 74‑ch achviaraŭ, siarod jakich znachodziacca astanki Mardechaja Šuleskiesa i Mojše Kramiera (ich imiony ŭstanoŭleny padčas ekshumacyi 1998 hoda pa aficyjnych błankach kvitancyj, jakija śviedčać, što ŭ 1940 hodzie ŭ hrodzienskaj turmie ŭ rasstralanych byli kanfiskavanyja hrošy. — BiełaPAN.), vystupiŭ daśledčyk temy stalinskich represij Ihar Kuźniacoŭ. Pavodle jaho słoŭ, vyniki troch śledstvaŭ va ŭročyščy paćvierdzili, što mienavita supracoŭniki NKUS u 1937—1941 hadach pravodzili rasstreły ŭ Kurapatach. «Aprača hramadzian Biełarusi, u 510 jamach lažać vychadcy z mnohich krain Jeŭropy i ZŠA», — skazaŭ I.Kuźniacoŭ. Pavodle jaho słoŭ, chacia ŭročyšča ŭniesiena ŭ Dziaržaŭny śpis historyka‑kulturnych kaštoŭnaściej Biełarusi jak miesca źniščeńnia achviaraŭ palityčnych represij, nidzie nie ličycca i nie achoŭvajecca dziaržavaj nivodzin z pamiatnych znakaŭ, ustanoŭlenych hramadskaściu ŭ Kurapatach.

Navukovy kiraŭnik abjekta «Historyka‑kulturnaja kaštoŭnaść «Kurapaty» Maja Klaštornaja paviedamiła, što ŭ pačatku 1960‑ch hadoŭ pry prakładcy hazapravoda praz uročyšča na jaje vačach z Kurapataŭ byli vyviezieny try samazvały kaściej. Pavodle jaje słoŭ, u 2001 hodzie na terytoryi ŭročyšča pravodzilisia raboty pa pašyreńni Minskaj kalcavoj aŭtamabilnaj darohi, chacia mieŭsia alternatyŭny prajekt prakładki mahistrali ŭ abychod Kurapataŭ. M.Klaštornaja vykazała spadziavańnie, što z časam hety prajekt budzie realizavany. Jana adznačyła vialikuju rabotu Kansiervatyŭna‑chryścijanskaj partyi — BNF pa zachavańni narodnaha miemaryjała.

• 0
• 0
• 0
• 0
• 0
• 0
• 0
• 0