U Minsku zatrymany aktyvist nacyjanał-balšavickaha ruchu Alaksandr Palakoŭ.
Jak paviedamlaje pres-słužba arhkamiteta pa stvareńni nacyjanał-balšavickaj partyi, Palakova zatrymali 6 traŭnia, kali jon vychodziŭ z domu, i dastavili va UUS Zavodskaha rajona Minska.
Niekalki hadzin tamu stała viadoma, što nacbołaŭ Dźmitryja Palijenku, Dzianisa Sachara i Jaŭhiena Kontuša vyklikajuć u milicyju. Z ranicy 6 traŭnia kala dźviarej kvater, dzie jany žyvuć, «dziažurać milicyjanty i nieviadomyja ludzi ŭ cyvilnym, jany pieryjadyčna zvoniać u damafon i dźviarny zvanok, patrabujuć u aktyvistaŭ prajści ź imi ŭ adździaleńnie milicyi», paviedamiła pres-słužba ruchu. «Takaja aktyŭnaść pravaachoŭnikaŭ źviazana ź niadaŭniaj akcyjaj suprać palityčna matyvavanych pieraśledaŭ», — pierakananyja ŭ arhkamitecie.
4 maja nacboły praviali ŭ Minsku akcyju, prymierkavanuju da adkryćcia čempijanatu śvietu pa chakiei. La hałoŭnaha ŭvachodu ŭ park Čaluskincaŭ jany paviesili raściažku ź simvaličnaj fatahrafijaj kiraŭnika dziaržavy ŭ centry i nadpisam «Usich nie pasadziš!». Aktyvisty ruchu taksama raspaŭsiudzili ŭ parku vialikaja kolkaść tematyčnych ulotak, jakija rastłumačvajuć sutnaść akcyi.
«Hetaj akcyjaj aktyvisty chočuć pryciahnuć uvahu hramadzian, uładaŭ i zamiežnych turystaŭ da vostraj prablemie palityčna matyvavanych represij suprać hramadskich i apazicyjnych aktyvistaŭ Biełarusi. U tym liku da tak zvanych previentyŭnych aryštaŭ, kali inšadumcaŭ — hramadzian Biełarusi izalujuć pa falšyvych abvinavačvańniach na čas dziaržaŭnych śviataŭ i inšych mierapryjemstvaŭ tolki za inšaje mierkavańnie, adroznaje ad mierkavańnia prezidenta, z nahody hramadska-palityčnaj situacyi ŭ krainie», — havaryłasia paviedamleńni nacbołaŭ.
Kamientary