«Patryjatyzm kožnaha čałavieka nieparyŭna źviazany z trapiatkim, pavažlivym staŭleńniem da ściaha, hierba i himna svajoj krainy. Biez hetaha niama hramadzianina, niama i dziaržavy», — havorycca ŭ vinšavańni Alaksandra Łukašenki z Dniom Dziaržaŭnaha hierba i ściaha Respubliki Biełaruś, jaki adznačajecca ŭ druhuju niadzielu maja.
«Naš narod stahodździami išoŭ da niezaležnaści, abaraniajučy siabie i rodnuju ziamlu ad fizičnaha i duchoŭnaha zaniavoleńnia, — cytuje Łukašenku jaho pres-słužba. — I hety šlach adlustravany ŭ hałoŭnych simvałach Respubliki Biełaruś, jakija ŭvasobili ŭ sabie najvažniejšyja kaštoŭnaści i ideały biełarusaŭ — luboŭ da Ajčyny, imknieńnie da svabody i spraviadlivaści, da stvaralnaj pracy na svajoj ziamli, žadańnie žyć u miry i zhodzie ŭ ahulnym biełaruskim domie».
«Siońnia dziaržaŭnyja ściah, hierb i himn abjadnoŭvajuć nas u adnu vialikuju siamju, napaŭniajučy sercy honaram za prynaležnaść da naroda z bahataj historyjaj, słaŭnym siońniašnim dniom i vydatnaj budučyniaj, — ličyć biełaruski kiraŭnik. — Chaj heta śviata jašče macniej źjadnaje ŭsich nas, umacuje vysokaje pačućcio asabistaj adkaznaści kožnaha hramadzianina za krainu i hatoŭnaści samaaddana pracavać dziela roskvitu Radzimy».
Nahadajem, ciapierašniaja dziaržaŭnaja simvolika była pryniata 7 červienia 1995 hoda pa vynikach nacyjanalnaha refierendumu. Ciapierašni hierb i ściah, za ŭzor jakich uziata simvolika BSSR, zamianili hierb «Pahonia» i bieł-čyrvona-bieły ściah, jakija byli aficyjnymi simvałami respubliki z 1991 hoda.
Kamientary