Zrabić pieršy krok nasustrač rodnaj movie stanie jašče praściej. Ad čaćviarha ŭ Minsku pačnucca novyja biaspłatnyja kursy biełaruskaj movy «Movavieda». Ładzić zaniatki budzie fiłołah Alaksiej Šein:
«Ja arhanizoŭvaŭ kursy biełaruskaj movy ŭ 2008-2012 hodzie. Jany tak i nazyvalisia: kursy biełaruskaj movy. Paśla piaci siezonaŭ zaniatkaŭ, praź jakija prajšło niekalki sotniaŭ čałaviek, kursy syšli ŭ adpačynak.
Ciapier było vyrašana adnavić kursy. Kab adbudavacca ad «Movy ci kavy» i «Movy nanova», daviałosia prydumać nazvu — «Movavieda».
Alaksiej kaža, što kursy padyduć dla luboha zacikaŭlenaha ŭ biełaruskaj movie čałavieka:
«Na kursach «Movavieda» nie budzie składanaha i sumnaha, nie budzie nudoty kštałtu vyvučeńnia hramatyki. «Movavieda» — heta nie kursy, dzie vučać novaj movie. Biełarusy viedajuć biełaruskuju movu, bo kali razmaŭlaješ ź biełarusam pa-biełarusku, jon razumieje. Adnak biełaruskaja mova znachodzicca ŭ pasivie. I maja zadača — pieravieści movu z pasiva ŭ aktyŭ.
Z ułasnaha dośviedu skažu: kab pierajści na biełaruskuju movu, pačać bačyć sny biełaruska movaj patrebna kala troch miesiacaŭ. Heta kali čałaviek vyrašyć: voś, pačynaju ad siońnia».
Kab pryjści na kursy «Movavieda» prosta tak, biez papiaredniaj rehistracyi. Šein abiacaje nasyčanyja zaniatki z dyskusijami, debatami, zajmalnymi testami i, viadoma, cikavymi haściami. Pieršym na zaniatak zavitaje akcior Kupałaŭskaha teatra Pavał Charłančuk.
Darečy, Pavał Charłančuk dapamahaŭ ahučvać virusnyja rekłamnyja roliki kursaŭ «Movavieda», jakija šyroka razyšlisia ŭ siecivie.
Zaniatki buduć pravodzicca z 22 maja štočaćvier a 19-j hadzinie ŭ kanfierenc-zale na 3-m paviersie biznes-centra «Valeo» pa adrasie: vuł. Skaryny, 12. Najbolš zručna jechać ad st. m. «Maskoŭskaja» na aŭtobusach №25, 34, 64 da prypynku «Kaledž suviazi» (6 prypynkaŭ ad mietro).
