Termin papiaredniaha rasśledavańnia ŭ dačynieńni da pravaabaroncy Andreja Bandarenki praciahnuty na miesiac

Kastryčnicki rajonny adździeł (Minska) Śledčaha kamiteta pradoŭžyŭ da siaredziny červienia termin papiaredniaha rasśledavańnia ŭ dačynieńni da kiraŭnika pryvatnaj infarmacyjna-aśvietnaj ustanovy «Płatform inaviejšn» Andreja Bandarenki, jaki abvinavačvajecca ŭ chulihanstvie.

«Termin pradoŭžyli jašče na miesiac, ale heta nie značyć, što rasśledavańnie pavinny zakončyć stroha da hetaha času. My spadziajomsia, što paśla zakančeńnia čempijanatu (čempijanat śvietu pa chakiei zaviaršajecca 25 maja) termin užo nie buduć zaciahvać», — paviedamiła Alena Krasoŭskaja-Kaśpiarovič, jakaja paśla aryštu Bandarenki ŭznačaliła «Płatform inaviejšn».

Jana taksama paviedamiła, što z aryštavanym pravaabaroncam naładžana pierapiska, jamu pieradajuć pieradačy vahoj da 30 kh. «U Andreja ŭsio ŭ paradku. Sa zdaroŭjem usio vydatna, nijakich skarhaŭ, ale my na ŭsiaki vypadak pieradali vitaminy, bo ŭ kancy zimy jon chvareŭ na zapaleńnie lohkich», — skazała Krasoŭskaja-Kaśpiarovič. 

Padrabiaznaści spravy pakul nieviadomyja, bo z advakata Bandarenki ŭziata padpiska ab nievydavańni.

Nahadajem, Andrej Bandarenka byŭ zatrymany supracoŭnikami Kastryčnickaha RUUS Minska 1 krasavika i z taho času ŭtrymlivajecca ŭ staličnym śledčym izalatary № 1 na vulicy Vaładarskaha. 

12 krasavika stała viadoma, što SK inkryminuje jamu ŭ tym liku napad na žančynu. Usiaho pravaabaroncu pradjaŭleny abvinavačańni pa troch epizodach złačynstvaŭ, praduhledžanych č. 1 (chulihanstva) i č. 3 art. 339 (asabliva złosnaje chulihanstva) Kryminalnaha kodeksa. Jamu pahražaje ad 3 da 10 hadoŭ pazbaŭleńnia voli.

Pravaabarončaj dziejnaściu Andrej Bandarenka zaniaŭsia paśla taho, jak pravioŭ za kratami biez małoha dva hady pa abvinavačańni va ŭčynieńni ekanamičnaha złačynstva. U sakaviku 2011 hoda Minski haradski sud pryznaŭ Bandarenku nievinavatym, a ŭ červieni taho ž hoda jon zasnavaŭ «Płatformu» — arhanizacyju, jakaja zajmałasia abaronaj pravoŭ čałavieka ŭ miescach pazbaŭleńnia voli.

U kastryčniku 2012 hoda «Płatforma» była likvidavana rašeńniem Minskaha haspadarčaha suda, paśla čaho Bandarenka i jaho adnadumcy zasnavali novuju arhanizacyju — «Płatform inaviejšn». 

Andrej Bandarenka nieadnarazova praśledvaŭsia ŭładami za pravaabarončuju dziejnaść, u tym liku karaŭsia administracyjnymi aryštami. Jamu taksama pahražali raspačynańniem kryminalnaj spravy nibyta za paklop u dačynieńni da supracoŭnikaŭ milicyi.

• 0
• 0
• 0
• 0
• 0
• 0
• 0
• 0