Stancyju mietro «Malinaŭka» płanujecca adkryć dla pasažyraŭ u pieršaj dekadzie červienia. Pra heta paviedamiŭ hałoŭny inžynier unitarnaha pradpryjemstva «Dyrekcyja pa budaŭnictvie Minskaha mietrapalitena» Alaksiej Murač.
«Probny ciahnik prajšoŭ da stancyi mietro «Malinaŭka» 23 maja. Zaraz my zaviaršajem pracy pa kančatkovym rehulavańni sistem i robim usio dla taho, kab adkryć stancyju ŭ pieršaj dekadzie červienia», — skazaŭ Alaksiej Murač.
Stancyja mietro «Malinaŭka» pabudavana na skryžavańni praśpiekta Dziaržynskaha i vulicy Jasienina pobač ź mikrarajonami Malinaŭka i Brylevičy. Jana stanie kancavym prypynkam pieršaj linii Minskaha mietrapalitena na paŭdniova-zachodnim radyusie linii. Daŭžynia ŭčastka padziemnych tunelaŭ ad susiedniaj stancyi «Piatroŭščyna» da «Malinaŭki» składaje 1,8 km.
