U Rasii patłumačyli pryčyny papularnaści «pucinskaha režymu»

Rejtynh prezidenta RF Uładzimira Pucina raście ŭ vačach rasiejcaŭ u pieryjad vojnaŭ z susiednimi krainami, jaho papularnaść na fonie rasiejska-ŭkrainskaha kanfliktu vyrasła da 83%.

Pra heta śviedčać vyniki sacyjałahičnaha daśledavańnia rasijskaha «Levada -centra», vyniki jakoha jość va UNIAN.

Tak, z pačatku hoda rejtynh Pucina vyras na 18%. Bolš jon byŭ tolki ŭ 2008 hodzie, padčas vajny z Hruzijaj — 87%.

Dyrektar «Levada-centra» Leŭ Hudkoŭ adznačaje, što rezki rost papularnaści Pucina siarod rasiejcaŭ prypadaje mienavita na vojny.

«Usio piki charakternyja takoj voś militarysckaj, vajaŭničaj rytorykaj, patryjatyčnym uzdymam. Kali pahladzieć na ŭsiu historyju staŭleńnia da Pucina, to pieršy taki ŭzdym byŭ padčas druhoj čačenskaj vajny, padčas vybuchaŭ damoŭ u Maskvie. Tady ŭsie pakazčyki faktyčna za dva miesiacy prosta ŭźlacieli», — adznačyŭ Hudkoŭ.

Na jaho dumku, užo tady byli aprabavanyja tyja pryjomy pravakavańnia hvałtu, rytoryka niehatyŭnaj mabilizacyi i apraŭdańnia prymianieńnia vajennaj siły Rasiejaj dla abarony «svaich» («fašyscki režym Saakašvili», «hienacyd», zmova suprać Rasii, pahroza pašyreńnia NATA i inš), jakija ŭ poŭnaj miery vykarystoŭvajucca ŭ ciapierašniaj vajnie z Ukrainaj.

«Ale praktyčna adrazu ž paśla hetaha, užo ŭvosień taho ž hoda, adbyŭsia finansava-ekanamičny kryzis, i rejtynh Pucina papoŭz uniz», — adznačaje Hudkoŭ.

Rejtynh Pucina (adabreńnie jaho dziejnaści abo davier da jaho) padaŭ da śniežnia 2013 hoda i spyniŭsia pierad Novym hodam. Potym, udakładniaje kiraŭnik «Levada-centra», pačałasia prapahandysckaja kampanija, źviazanaja z Alimpijadaj.

«Patryjatyčnyja mierapryjemstvy, televizijnyja zachapleńni z nahody sočynskich śpiektaklaŭ, natužlivaja ejfaryja nakont našych pieramoh. Heta byŭ časovy pośpiech ułady, paśla jaho pavinna było b znoŭ pačacca źnižeńnie rejtynhu, ale Majdan ci, dakładniej, rasiejskaja reakcyja na vyhnańnie Janukoviča pierałamała trend masavych nastrojaŭ», — patłumačyŭ Hudkoŭ.

Pavodle jaho słoŭ, ukrainskija padziei, dakładniej, vielmi ahresiŭnaja i «tatalnaja prapahandysckaja kampanija suprać ukrainskaj demakratyi, što skinuła karumpavany režym Janukoviča, jaki padtrymlivajecca Maskvoj; dyskredytacyja imknieńniaŭ značnaj častki ŭkrainskaha hramadstva da intehracyi ź Jeŭropaj, prapahanda, jakaja zahavaryła na movie vajny, mabilizacyjnaja rytoryka baraćby z «banderaŭcami», z «ukrainskim fašyzmam» rezka źmianiła staŭleńnie rasiejcaŭ da ŭłady».

«Ułada, jakaja da hetaha ŭsprymałasia jak karumpavanaja, ehaistyčnaja, niekampietentnaja, mafijoznaja, paviała siabie ŭ adpaviednaści z raniejšymi, jašče savieckimi standartami brežnieŭskaj «supierdziaržavy»: viarnuła Krym, prademanstravała ŭsiamu śvietu svoj svojeasablivy charaktar, rezka pavialičyŭšy tym samym svoj simvaličny status u vačach rasiejcaŭ», — kaža Hudkoŭ.

Jon upeŭnieny, što adabreńnie hetych dziejańniaŭ radykalna ŭzmacniła padtrymku pucinskaha režymu, viarnuła jamu paŭnatu lehitymnaści. «Efiektam prapahandy telebačańnia stała praktyčnaje źniknieńnie adroźnieńniaŭ u padtrymcy ŭłady siarod roznych sacyjalnych hrup», — padkreślivaje kiraŭnik «Levada-centra».

Pry hetym, na dumku sacyjołaha, chvala patryjatyčnych pieražyvańniaŭ i krymskaj ejfaryi spadzie ŭ bližejšyja miesiacy, ale nastupstvy hetaj palityki buduć adčuvacca na praciahu dziesiacihodździaŭ — jak i nastupstvy čačenskaj vajny.

«U bolš surjoznym i doŭhačasovym płanie my majem spravu ź niezavieršanym pracesam krachu savieckaj sistemy i niazdolnaściu pierapracavać i pieraadoleć savieckaje tatalitarnaje minułaje», — adznačyŭ Hudkoŭ.

• 0
• 0
• 0
• 0
• 0
• 0
• 0
• 0