Pravasłaŭnaja i katalickaja cerkvy Biełarusi zaklikajuć ułady admianić śmiarotnaje pakarańnie. Pra heta zajaviŭ mitrapalit Minska-Mahiloŭski arcybiskup Tadevuš Kandrusievič 5 červienia na pres-kanfierencyi pa vynikach IV Jeŭrapiejskaha pravasłaŭna-katalickaha forumu, jaki prachodziŭ u Minsku 2-5 červienia.
«Pravasłaŭnaja i katalickaja cerkvy Biełarusi vystupajuć suprać śmiarotnaha pakarańnia, my ŭ hetym pytańni zhodnyja», — skazaŭ Kandrusievič.
Jon padkreśliŭ, što ŭłady pavinny zakanadaŭča admianić prymianieńnie śmiarotnaha pakarańnia. «My suprać pakarańnia. Žyćcio — vialiki dar Boha. Boh daje žyćcio, i tolki jon moža jaho zabrać. Katalickaja i pravasłaŭnaja cerkvy vystupajuć u abaronu žyćcia — ad začaćcia da śmierci», — skazaŭ mitrapalit Kandrusievič.
Biełaruś — adzinaja kraina ŭ Jeŭropie, dzie da hetaha času ŭžyvajecca śmiarotnaje pakarańnie, a taksama adzinaja jeŭrapiejskaja dziaržava, jakaja nie ŭvachodzić u Saviet Jeŭropy. Asnoŭnaj pieraškodaj dla ŭvachodžańnia źjaŭlajecca najaŭnaść śmiarotnaha pakarańnia.
Pavodle źviestak «Mižnarodnaj amnistyi» i kampanii «Pravaabaroncy suprać śmiarotnaha pakarańnia ŭ Biełarusi», za apošnija 20 hadoŭ u krainie pakarana bolš za 400 čałaviek. U adkaz na zakliki pravaabaroncaŭ ŭvieści maratoryj na śmiarotnaje pakarańnie albo admianić jaho ŭłady spasyłajucca na vyniki refierendumu 1996 hoda, padčas jakoha bolšaść biełaruskich hramadzian vystupili za zachavańnie śmiarotnaha pakarańnia.
