3 červienia ŭ ciahniku «Dnieprapiatroŭsk—Sankt-Pieciarburh» pjany 50-hadovy žychar Homiela, jaki jechaŭ na zarobki ŭ Sankt-Pieciarburh, napaŭ z nažom na dvuch ukraincaŭ.
Paśla pasadki ŭ ciahnik mužčyna vypiŭ butelku harełki, paznajomiŭsia z dvuma hramadzianami Ukrainy i sieŭ ź imi hulać u karty. Adnak hulnia nie załadziłasia — biełarusu zdałosia, što ŭkraincy padmirhvajuć adzin adnamu i žulničajuć.
Pry padjeździe ciahnika da Viciebska, kala 20:00, hamialčanin vyrašyŭ «navučyć» svaich partnioraŭ praviłam sumlennaj hulni i nakinuŭsia na ich z nažom. U vyniku adzin z ukraincaŭ, 27-hadovy mužčyna, atrymaŭ nažavoje ranieńnie.
Jak raspavioŭ načalnik liniejnaha punkta Viciebskaha adździeła ŭnutranych spraŭ na transparcie Viačasłaŭ Stachoŭski, debašyr byŭ zatrymany ŭ Viciebsku supracoŭnikami AUST. Paciarpiełaha taksama daviałosia źniać ź ciahnika dla akazańnia miedycynskaj dapamohi.
Suprać hamialčanina ŭzbudžanaja kryminalnaja sprava pa častcy 3 artykuła 339 KK (asabliva złosnaje chulihanstva, karajecca pazbaŭleńniem voli na termin ad troch da dziesiaci hadoŭ). Cikava, što ŭ hulni, jakaja vyklikała kanflikt, navat nie było hrašovych stavak.
